ઈરાનને પરમાણુ શસ્ત્રો પ્રાપ્ત કરતા અટકાવાશેઃ ઈઝરાયલ

ઈઝરાયલના વડા પ્રધાન બેન્જામિન નેતન્યાહુએ જણાવ્યું હતું કે, તેમનો દેશ ઈરાનને પરમાણુ શસ્ત્રો પ્રાપ્ત કરવાથી રોકવા માટે સંપૂર્ણપણે સંકલ્પબદ્ધ છે. નેસેટ (ઇઝરાયેલ સંસદ)ના શિયાળુ સત્રમાં બોલતા, નેતન્યાહુએ જણાવ્યું હતું કે, 'ઇરાનના પરમાણુ કાર્યક્રમને રોકવો એ આપણા મગજમાં સૌથી આગળ છે. નેતન્યાહુએ ઈરાનને પરમાણુ હથિયારો પ્રાપ્ત કરવાથી રોકવા માટે ઈઝરાયેલની લાંબા ગાળાની રણનીતિ પણ ગણાવી હતી.

તેમણે વધુમાં જણાવ્યું હતું કે, "અમારી લાંબા ગાળાની રણનીતિમાં દુષ્ટતાની ધરીનો નાશ કરવો, દક્ષિણ અને ઉત્તરમાં તેના શસ્ત્રો કાપવા, ઈરાન અને તેના સહયોગીઓ પાસેથી ભારે કિંમત વસૂલવી અને ઈરાનને પરમાણુ શસ્ત્રો પ્રાપ્ત કરવાથી રોકવાનો સમાવેશ થાય છે." મને આશા છે કે નજીકના ભવિષ્યમાં આ પ્રાપ્ત થશે. તેમણે કહ્યું કે ઈરાન ઈઝરાયેલને નષ્ટ કરવાના ઉદ્દેશ્ય સાથે પરમાણુ બોમ્બનો 'સ્ટોકપાઈલ' વિકસાવવાનો પ્રયાસ કરી રહ્યું છે.

ઇઝરાયલના વડા પ્રધાને વધુમાં જણાવ્યું હતું કે, 'મેં હાર માની નથી અને અમે આ કેન્દ્રીય લક્ષ્યને પ્રાપ્ત કરવામાં પાછળ હટીશું નહીં.' નેતન્યાહુ પર ઈરાનના પરમાણુ કેન્દ્રો પર હુમલો કરવાનું દબાણ હતું. ઘણા નેતાઓએ ઈરાનના પરમાણુ મથકોને નિશાન ન બનાવતા ઈઝરાયેલના હુમલાને નબળું પગલું ગણાવ્યું હતું અને તેને ચૂકી ગયેલી તક ગણાવી હતી. નેતન્યાહુના ટીકાકારોએ તેમના પર યુએસ દબાણ સામે ઝૂકવાનો અને ઇઝરાયેલની વ્યૂહાત્મક જરૂરિયાતોને ધ્યાનમાં ન લેવાનો આરોપ મૂક્યો છે.

તેમણે વધુમાં જણાવ્યું હતું કે, 'અમે અમારા અમેરિકન મિત્રો સાથે સતત વાતચીત કરીએ છીએ, પરંતુ અમે અમારી સુરક્ષા સાથે સંબંધિત મહત્વપૂર્ણ નિર્ણયો અમારા પોતાના હિતો અને મંતવ્યો અનુસાર લઈએ છીએ. તેમાં ધ્યેયો અને ઉદ્દેશોની પસંદગીનો પણ સમાવેશ થાય છે.