ઈઝરાયલ ઉપર હુમલા માટે હમાસને ઈરાને આર્થિક સમર્થન આપ્યાનો કરાયો દાવા
ઇઝરાયલે એક ગુપ્ત દસ્તાવેજ જાહેર કર્યો છે. ઇઝરાયલી અધિકારીઓના મતે, આ દસ્તાવેજ હમાસ અને ઈરાન વચ્ચે સીધા નાણાકીય જોડાણનો પર્દાફાશ કરે છે. આમાં ઇઝરાયલ પર હુમલો કરવાની યોજનાને કથિત રીતે અમલમાં મૂકવા માટે તેહરાન તરફથી $500 મિલિયનની વિનંતીનો પણ સમાવેશ થાય છે.
ઇઝરાયલના સંરક્ષણ પ્રધાન ઇઝરાયલ કાત્ઝે સોશિયલ મીડિયા પ્લેટફોર્મ X પર રિપોર્ટ અને તેની સાથેનો વીડિયો શેર કર્યો છે. તેમણે કહ્યું, "હું અહીં પહેલીવાર એક દસ્તાવેજ શેર કરી રહ્યો છું. તે ગાઝામાં હમાસના વરિષ્ઠ અધિકારીઓની સુરંગોમાંથી મળી આવ્યો હતો, જે ઈરાન અને યાહ્યા સિનવાર અને મુહમ્મદ દેઈફ (બંને વરિષ્ઠ હમાસ નેતાઓ) વચ્ચે સીધો સંબંધ સાબિત કરે છે. આ ઇઝરાયલનો નાશ કરવાની હમાસ યોજનાને ઈરાનના સમર્થનનો એક ભાગ છે."
ટાઈમ્સ ઓફ ઈઝરાયલના અહેવાલ મુજબ, હમાસનો આ દસ્તાવેજ ઈઝરાયલી સંરક્ષણ દળો (IDF) દ્વારા હમાસ સુરંગોમાં એક ઓપરેશન દરમિયાન મળી આવ્યો હતો. "તેમાં ઈરાનના ઇસ્લામિક રિવોલ્યુશનરી ગાર્ડ કોર્પ્સ (IRGC) કુદ્સ ફોર્સ તરફથી હમાસ દ્વારા બે વર્ષમાં દર મહિને $20 મિલિયનની માંગની વિગતો આપવામાં આવી છે," તેમ કાત્ઝે જણાવ્યું હતું.
કાત્ઝે એવો પણ દાવો કર્યો હતો કે, "IRGCના પેલેસ્ટિનિયન વિભાગના વડા હુસૈન અકબરી ઇઝાદીએ ઈરાનને આર્થિક મુશ્કેલીઓ છતાં હમાસને સતત સમર્થન આપવાની ખાતરી આપી હતી. તેમણે કહ્યું કે ઈરાનનો ટેકો ગાઝાથી આગળ લેબનોન, સીરિયા, જુડિયા, સમરિયા અને યમનના હુથી સહિત અન્ય પ્રદેશોમાં ફેલાયેલો છે. તેમણે તેને 'આતંકવાદનો વ્યાપક ધરી' ગણાવ્યો."
સંરક્ષણ પ્રધાને જાહેરાત કરી કે, "ઈઝરાયલ ઈરાનને પરમાણુ શસ્ત્રો પ્રાપ્ત કરતા અટકાવવા માટે શક્ય તેટલું બધું કરશે. જ્યાં સુધી ઈરાનની દુષ્ટ ધરીનો નાશ ન થાય ત્યાં સુધી તે તેના આતંકવાદી લક્ષ્યો પર હુમલો કરવાનું ચાલુ રાખશે."
