IPL 2025 : લખનૌ સુપર જાયન્ટસનો આ ફાસ્ટ બોલર પ્રારંભની કેટલીક મેચોમાં જોવા નહીં મળે

IPL ની 18મી આવૃત્તિ (IPL 2025) 22 માર્ચથી શરૂ થવા જઈ રહી છે. બધી IPL ટીમોએ તૈયારીઓ શરૂ કરી દીધી છે. પરંતુ IPL શરૂ થાય તે પહેલા લખનૌ સુપર જાયન્ટ્સને મોટો ઝટકો લાગ્યો છે. ટીમનો યુવા બોલર મયંક યાદવ તેની ઈજામાંથી હજુ સુધી સ્વસ્થ થયો નથી, તે IPL 2025 ના પહેલા ભાગમાં રમી શકશે નહીં તેવું માનવામાં આવે છે. તે IPLના બીજા ભાગથી રમી શકે છે.

મયંક યાદવે તેની ગતિથી બધાને પ્રભાવિત કર્યા છે, તે મોટા બેટ્સમેનોને પરેશાન કરતો જોવા મળ્યો હતો. આ જ કારણ હતું કે લખનૌ સુપર જાયન્ટ્સે તેને હરાજી પહેલા 11 કરોડ રૂપિયામાં રિટેન કર્યો હતો. આ તેમના IPL પગારમાં મોટો વધારો હતો કારણ કે લખનૌએ તેમને પાછલી સીઝનમાં 20 લાખ રૂપિયામાં ખરીદ્યા હતા.

ગયા વર્ષે ઓક્ટોબરમાં બાંગ્લાદેશ સામે આંતરરાષ્ટ્રીય ક્રિકેટમાં ડેબ્યૂ કર્યા પછી મયંક યાદવ ઈજાગ્રસ્ત થયો હતો. મયંક યાદવને કમરના નીચેના ભાગમાં ઈજા થઈ હતી, જેમાંથી તે સ્વસ્થ થઈ રહ્યો છે. સારી વાત એ છે કે તેણે તાજેતરમાં બેંગલુરુના સેન્ટર ઓફ એક્સેલન્સમાં ફરી બોલિંગ શરૂ કરી છે.

રિપોર્ટ અનુસાર, BCCI એ મયંક યાદવની વાપસી માટે કોઈ તારીખ નક્કી કરી નથી. જો મયંક ફિટનેસના ધોરણોને પૂર્ણ કરે છે અને તેના વર્કલોડમાં વધારો કરે છે, તો શક્ય છે કે તે IPL 2025 ના બીજા ભાગમાં રમતા જોવા મળે.

મયંક યાદવે IPL 2024 માં 4 મેચ રમી હતી, જેમાં તેણે 7 વિકેટ લીધી હતી. તેમની ઇકોનોમી લગભગ 7 (6.99) હતી. ગયા વર્ષે તે પોતાની ઝડપી બોલિંગને કારણે હેડલાઇન્સમાં રહ્યો હતો. તેણે RCB સામે IPL 2024નો સૌથી ઝડપી બોલ (156.7) ફેંક્યો.

લખનૌ સુપર જાયન્ટ્સ દિલ્હી કેપિટલ્સ સામે રમીને તેમની IPL 2025 ની સફર શરૂ કરશે, તેમની પહેલી મેચ 24 માર્ચે રમાશે. IPL 2025 માટે, ફ્રેન્ચાઇઝીએ ઋષભ પંતને તેના કેપ્ટન તરીકે પસંદ કર્યા છે, જેમને ટીમે હરાજીમાં 27 કરોડ રૂપિયામાં ખરીદ્યા હતા.