IPL 2025 : કોલકાતા નાઈટ રાઈડર્સે રાજસ્થાન રોયલ્સને હરાવીને જીત નોંધાવી

ઇન્ડિયન પ્રીમિયર લીગ (IPL) 2025 ની છઠ્ઠી મેચમાં કોલકાતા નાઈટ રાઇડર્સ (KKR) એ શાનદાર પ્રદર્શન કર્યું અને રાજસ્થાન રોયલ્સ (RR) ને આઠ વિકેટથી હરાવ્યું છે. આ મેચ બુધવારે આસામના બારસાપારા ક્રિકેટ સ્ટેડિયમ ખાતે રમાઈ હતી, જ્યાં KKR એ સિઝનની પોતાની પહેલી જીત નોંધાવી હતી.

રાજસ્થાન રોયલ્સે પ્રથમ બેટિંગ કરતા 20 ઓવરમાં 151/9 રન બનાવ્યા હતા. ધ્રુવ જુરેલ (૩૩), યશસ્વી જયસ્વાલ (૨૯) અને કેપ્ટન રિયાન પરાગ (૨૫) એ ઉપયોગી ઇનિંગ્સ રમી પરંતુ કેકેઆરના બોલરોએ તેમને પડકારદાયક સ્કોર કરવા માટે પરાસ્ત કર્યા હતા. વૈભવ અરોરા, હર્ષિત રાણા, મોઈન અલી અને વરુણ ચક્રવર્તીએ શાનદાર બોલિંગ કરી અને બે-બે વિકેટ લીધી હતી. કોલકાતા નાઈટ રાઈડર્સે રનચેસ કરતા 17.3 ઓવરમાં માત્ર બે વિકેટ ગુમાવીને 153 રન બનાવ્યા અને મેચ જીતી હતી.

આ જીતનો હીરો દક્ષિણ આફ્રિકાના બેટ્સમેન ક્વિન્ટન ડી કોક હતા. જેમણે અણનમ 97 રનની શાનદાર ઇનિંગ્સ રમી હતી. તેમણે 61 બોલમાં આઠ ચોગ્ગા અને છ છગ્ગા ફટકાર્યા હતા. તેમના સિવાય અંગક્રિશ રઘુવંશીએ 22 રન બનાવ્યા હતા. કેપ્ટન અજિંક્ય રહાણેએ 18 રન અને મોઈન અલીએ પાંચ રન ઉમેર્યા. રાજસ્થાન રોયલ્સનો આ સતત બીજો પરાજય હતો. ટીમને તેની પહેલી મેચમાં સનરાઇઝર્સ હૈદરાબાદ (SRH) સામે 44 રનથી હારનો સામનો કરવો પડ્યો હતો. આ જીત સાથે KKR એ IPL 2025 માં પોતાનું ખાતું ખોલ્યું, જ્યારે રાજસ્થાન રોયલ્સ હજુ પણ પોતાની પહેલી જીતની શોધમાં છે.