આઈપીએલ 2025: બુમરાહ મુંબઈ ઈન્ડિયન્સ માટે શરૂઆતની 3-4 મેચ ગુમાવે તેવી શકયતા

જસપ્રીત બુમરાહને ક્રિકેટના મેદાનમાં પાછા ફરવા માટે વધુ રાહ જોવી પડી શકે છે. બુમરાહ ઈજાના કારણે ચેમ્પિયન્સ ટ્રોફી 2025માં રમી શક્યો ન હતો, હવે એક નવી અપડેટ આવી છે કે તે IPL 2025ના પહેલા બે અઠવાડિયામાં કોઈ મેચ રમી શકશે નહીં. એક મીડિયા રિપોર્ટ અનુસાર, જસપ્રીત બુમરાહ એપ્રિલ મહિનામાં મુંબઈ ઈન્ડિયન્સના તાલીમ શિબિરમાં જોડાઈ શકે છે, જ્યારે IPL 2025 22 માર્ચથી શરૂ થવાનું છે.

સુત્રોએ જણાવ્યું હતું કે, "જસપ્રીત બુમરાહના મેડિકલ રિપોર્ટ સારા છે. તેણે સેન્ટર ઓફ એક્સેલન્સમાં બોલિંગ પ્રેક્ટિસ શરૂ કરી દીધી છે. પરંતુ IPL ની શરૂઆતની મેચોમાં તેના રમવાની આશા ઓછી છે. વર્તમાન પરિસ્થિતિ મુજબ, એપ્રિલના પહેલા અઠવાડિયામાં તેની વાપસી શક્ય છે."

આવી સ્થિતિમાં, જસપ્રીત બુમરાહ મુંબઈ ઈન્ડિયન્સ માટે શરૂઆતની 3-4 મેચ રમી શકશે નહીં. એવું કહેવામાં આવી રહ્યું છે કે બુમરાહ પૂરી તાકાતથી બોલિંગ કરી શકતો નથી. રિપોર્ટમાં જણાવાયું છે કે તબીબી ટીમ ધીમે ધીમે તેમના કાર્યભારમાં વધારો કરશે. બુમરાહ જ્યાં સુધી પૂરા જોશ અને તાકાતથી બોલિંગ કરી શકશે નહીં ત્યાં સુધી તેને ફિટ જાહેર કરવામાં આવશે નહીં. લખનૌ સુપર જાયન્ટ્સના ફાસ્ટ બોલર મયંક યાદવ પણ સંપૂર્ણપણે ફિટ નથી. એવું અનુમાન લગાવવામાં આવી રહ્યું છે કે તે પણ એપ્રિલ મહિનામાં LSG ના તાલીમ શિબિરમાં જોડાઈ શકે છે.

ઓસ્ટ્રેલિયા સામેની ટેસ્ટ શ્રેણી દરમિયાન જસપ્રીત બુમરાહને કમરની તકલીફ થવા લાગી હતી. સિડની ટેસ્ટની બીજી ઇનિંગમાં તે બોલિંગ કરવા માટે મેદાનમાં પણ આવ્યો ન હતો. તે પછી, મેડિકલ ટીમે તેના પર નજીકથી નજર રાખી, પરંતુ તે ચેમ્પિયન્સ ટ્રોફી 2025 પહેલા સંપૂર્ણપણે ફિટ થઈ શક્યો નહીં.