ભારતનું ફૂટવેર ક્ષેત્ર આત્મનિર્ભરતા અને વૈશ્વિક નિકાસમાં વધારાની વિશાળ તકો ધરાવે છેઃ રાષ્ટ્રપતિ

રાષ્ટ્રપતિ દ્રૌપદી મુર્મુએ FDDI ના દીક્ષાંત સમારોહમાં સંબોધન કર્યું અને ભારતને વિશ્વનો બીજો સૌથી મોટો ફૂટવેર ઉત્પાદક ગણાવ્યો હતો. તેમણે કહ્યું કે ભારતનું ફૂટવેર ક્ષેત્ર 'ચેમ્પિયન સેક્ટર' છે, જે આત્મનિર્ભરતા અને વૈશ્વિક નિકાસમાં વધારાની વિશાળ તકો ધરાવે છે. રાષ્ટ્રપતિએ વિદ્યાર્થીઓને ઉચ્ચ ગુણવત્તાવાળા ઉત્પાદનો દ્વારા સ્વાસ્થ્ય, સુવિધા અને વૈશ્વિક સ્તરે ભારતનું પ્રતિનિધિત્વ કરવા હાકલ કરી હતી. રાષ્ટ્રપતિ દ્રૌપદી મુર્મુએ આજે સોમવારે નવી દિલ્હીમાં આયોજિત ફૂટવેર ડિઝાઇન એન્ડ ડેવલપમેન્ટ ઇન્સ્ટિટ્યૂટ (FDDI) ના દીક્ષાંત સમારોહમાં ભાગ લીધો. આ દરમિયાન તેમણે ભારતના ફૂટવેર ઉદ્યોગમાં ઝડપથી વિકસતી તકો પર પ્રકાશ પાડ્યો હતો.

રાષ્ટ્રપતિએ કહ્યું કે ભારત સતત આત્મનિર્ભર બની રહ્યું છે અને વૈશ્વિક અર્થતંત્રમાં પોતાની મજબૂત સ્થિતિ બનાવી રહ્યું છે. તેમણે જણાવ્યું કે વાણિજ્ય અને ઉદ્યોગ મંત્રાલય હેઠળના DPIIT એ ફૂટવેર સેક્ટરને ‘ચેમ્પિયન સેક્ટર’જાહેર કર્યું છે, જે રોકાણ અને વિકાસને પ્રોત્સાહન આપવાના સરકારના પ્રયાસો દર્શાવે છે. રાષ્ટ્રપતિએ જણાવ્યું કે ભારત વિશ્વનો બીજો સૌથી મોટો ફૂટવેર ઉત્પાદક અને ઉપભોક્તા છે. વર્ષ 2024-25માં ભારતે 2.5 અબજ અમેરિકી ડૉલરથી વધુ મૂલ્યના ફૂટવેરની નિકાસ કરી, જ્યારે આયાત લગભગ 680 મિલિયન ડૉલર રહી. તેમણે કહ્યું કે ભારત પહેલેથી જ વિશ્વના મુખ્ય નિકાસકારોમાં સામેલ છે અને આ ક્ષેત્રમાં વધુ વિસ્તરણથી રોજગાર અને ઉદ્યોગસાહસિકતાની તકો ઝડપથી વધશે.

રાષ્ટ્રપતિ મુર્મુએ FDDI અને યુનિવર્સિટી ઓફ નોર્થહેમ્પટન (યુકે) વચ્ચે થયેલા સમજૂતી કરારનું સ્વાગત કર્યું. તેમણે કહ્યું કે આ સમજૂતી ભારત-યુકે સહયોગને વધુ મજબૂત કરે છે અને બંને દેશો વચ્ચે મુક્ત વેપાર કરારના માળખા હેઠળ એક મહત્ત્વનું પગલું છે. દીક્ષાંત સમારોહમાં ઉપસ્થિત વિદ્યાર્થીઓને સંબોધતા રાષ્ટ્રપતિએ કહ્યું કે ફૂટવેર ડિઝાઇન માત્ર એક રચનાત્મક ક્ષેત્ર જ નહીં પણ સમાજ અને અર્થતંત્ર, બંનેને મજબૂત કરતું મહત્ત્વનું ક્ષેત્ર છે. તેમણે વિદ્યાર્થીઓને આગ્રહ કર્યો કે તેઓ એવા ઉત્પાદનો તૈયાર કરે જે લોકોના સ્વાસ્થ્ય અને સુવિધામાં સુધારો કરે, રોજગાર, સર્વસમાવેશક વિકાસને પ્રોત્સાહિત કરે, ભારતની નિકાસ ક્ષમતાને મજબૂત કરે અને ઉચ્ચ ગુણવત્તા દ્વારા વિશ્વ સ્તરે ભારતનું પ્રતિનિધિત્વ કરે. તેમણે કહ્યું કે યુવા ડિઝાઇનર્સનું કાર્ય આત્મનિર્ભર ભારતનાં નિર્માણમાં મહત્ત્વપૂર્ણ યોગદાન આપી શકે છે.