ભારતઃ રોકાણ અને વેપાર સુવિધાને પ્રોત્સાહન આપવા માટે 'ઈએફટીએ ડેસ્ક' સ્થાપિત કરશે

નવી દિલ્હીઃ ભારત યુરોપિયન ફ્રી ટ્રેડ એસોસિએશન (ઈએફટીએ) સાથે વેપાર, રોકાણ અને વ્યવસાય સુવિધાને પ્રોત્સાહન આપવા માટે એક સમર્પિત પ્લેટફોર્મ 'ઈએફટીએ ડેસ્ક' સ્થાપિત કરી રહ્યું છે. કેન્દ્રીય વાણિજ્ય અને ઉદ્યોગ મંત્રી પીયૂષ ગોયલ, સોમવારે ભારત મંડપમ ખાતે ઈએફટીએ બ્લોકના સહયોગથી તેનું ઉદ્ઘાટન કરશે.

વાણિજ્ય અને ઉદ્યોગ મંત્રાલયે એક નિવેદનમાં જણાવ્યું હતું કે, કેન્દ્રીય મંત્રી પીયૂષ ગોયલ નવી દિલ્હીના ભારત મંડપમ ખાતે ઈએફટીએ બ્લોક સાથે ઈએફટીએ ડેસ્કનું ઉદ્ઘાટન કરશે. ઈએફટીએ બ્લોકનું પ્રતિનિધિત્વ, સ્વિસ સ્ટેટ સેક્રેટરી હેલેન બુડલિગર આર્ટેડા, નોર્વેના ટ્રેડ અને ઇન્ડસ્ટ્રીના સ્ટેટ સેક્રેટરી ટોમસ નોર્વોલ, આઇસલેન્ડના સ્થાયી સેક્રેટરી માર્ટિન એજોલ્ફસન, લિક્ટેંસ્ટાઇનના વિદેશ, શિક્ષણ અને રમતગમત મંત્રી ડોમિનિક હાસ્લર, ઈએફટીએ સચિવાલયના ડેપ્યુટી સેક્રેટરી જનરલ માર્કસ સ્લેગેનહોફ અને ઈએફટીએ સચિવાલયના વરિષ્ઠ અધિકારી ડેવિડ સ્વેનબજોર્નસન કરશે.

ભારત અને ઈએફટીએ, દેશોની 100 થી વધુ કંપનીઓ બિઝનેસ રાઉન્ડટેબલમાં ભાગ લેશે. ભારત-ઈએફટીએ સમર્પિત ડેસ્ક ભારતમાં વિસ્તરણ કરવા ઇચ્છતી ઈએફટીએ કંપનીઓ માટે કેન્દ્રિયકૃત સહાયક પદ્ધતિ તરીકે કાર્ય કરશે. તે બજાર માહિતી અને નિયમનકારી માર્ગદર્શન, વ્યવસાયિક મેચિંગ અને ભારતની નીતિ અને રોકાણના પરિદૃશ્યને સમજવામાં સહાય પૂરી પાડશે. આ પ્રસંગે, ઉદ્યોગ અને આંતરિક વેપાર પ્રમોશન વિભાગ (ડીપીઆઈઆઈટી) અને વાણિજ્ય વિભાગ (ડીઓસી) ના વરિષ્ઠ અધિકારીઓ પણ સભાને સંબોધિત કરશે અને ઈએફટીએ દેશો સાથે મજબૂત આર્થિક ભાગીદારી માટે ભારતના વિઝનની રૂપરેખા આપશે.

ઉલ્લેખનીય છે કે, ભારત અને ચાર યુરોપિયન દેશોના ઈએફટીએ એ 10 માર્ચ, 2024 ના રોજ વેપાર અને રોકાણ સંબંધોને પ્રોત્સાહન આપવા માટે મુક્ત વેપાર કરાર પર હસ્તાક્ષર કર્યા હતા. આ કરાર, જેને સત્તાવાર રીતે વેપાર અને આર્થિક ભાગીદારી કરાર (ટીઈપીએ) કહેવામાં આવે છે, તે આ વર્ષના અંત સુધીમાં અમલમાં આવવાની અપેક્ષા છે. યુરોપિયન ફ્રી ટ્રેડ એસોસિએશનના સભ્યો આઇસલેન્ડ, લિક્ટેંસ્ટાઇન, નોર્વે અને સ્વિટ્ઝર્લૅન્ડ છે.