ભારત કરોડો લોકોની આકાંક્ષાઓથી પ્રેરિત થઈને વિકાસના માર્ગ પર આગળ વધી રહ્યું છે: PM મોદી

નવી દિલ્હીઃ પ્રધાનમંત્રી નરેન્દ્ર મોદીએ મંગળવારે સવારે ઓડિશાના ભુવનેશ્વરમાં જનતા મેદાન ખાતે 'ઉત્કર્ષ ઓડિશા, મેક-ઇન-ઓડિશા કોન્ક્લેવ'નું ઉદ્ઘાટન કર્યું. કોન્ક્લેવને સંબોધતા પીએમ મોદીએ કહ્યું, “પૂર્વીય ભારત દેશના વિકાસમાં વૃદ્ધિનું એન્જિન છે. આમાં ઓડિશાની મહત્વપૂર્ણ ભૂમિકા છે. પીએમએ વધુમાં ઉમેર્યું હતું કે, ઇતિહાસ સાક્ષી છે કે જ્યારે વૈશ્વિક વિકાસમાં ભારતનો મોટો ફાળો હતો, ત્યારે પૂર્વી ભારતનો મહત્વપૂર્ણ ફાળો હતો. પૂર્વ ભારતમાં દેશમાં મુખ્ય ઔદ્યોગિક કેન્દ્રો, મોટા બંદરો અને વેપાર કેન્દ્રો હતા. ઓડિશા દક્ષિણ પૂર્વ એશિયામાં વેપારનું એક મુખ્ય કેન્દ્ર હતું. અહીંના પ્રાચીન બંદરો ભારત આવવાના પ્રવેશદ્વાર હતા.

પ્રધાનમંત્રીએ કહ્યું, ઓડિશા ખરેખર ઉત્તમ છે. ઓડિશા નવા ભારતના આશાવાદ અને મૌલિકતાનું પ્રતીક છે. ઓડિશા તકોની ભૂમિ છે અને અહીંના લોકોએ હંમેશા વધુ સારું પ્રદર્શન કરવાનો જુસ્સો દર્શાવ્યો છે. પ્રધાનમંત્રી મોદીએ કહ્યું હતું કે, ભારત ગ્રીન ફ્યુચર અને ગ્રીન ટેક પર ધ્યાન કેન્દ્રિત કરી રહ્યું છે. સૌર-પવન-હાઇડ્રો હોય કે ગ્રીન હાઇડ્રોજન, આ વિકસિત ભારતની ઊર્જા સુરક્ષાને શક્તિ આપશે. પીએમ મોદીએ કહ્યું કે, 21મી સદીના ભારત માટે, આ કનેક્ટેડ ઈન્ફ્રાસ્ટ્રક્ચર અને મલ્ટી-મોડલ કનેક્ટિવિટીનો યુગ છે.

પીએમએ કહ્યું કે, ઓડિશામાં પર્યટન માટે અપાર સંભાવનાઓ રહેલી છે. આજે ભારતનું ધ્યાન 'વેડ ઇન ઇન્ડિયા' પર છે, આજે ભારતનો મંત્ર 'હીલ ઇન ઇન્ડિયા' પર છે અને આ માટે ઓડિશાની પ્રકૃતિ, આ સ્થળનું કુદરતી સૌંદર્ય ખૂબ મદદરૂપ છે. પ્રધાનમંત્રીએ કહ્યું કે, યુવા પ્રતિભાઓના વિશાળ સમૂહ અને કોન્સર્ટ માટે વિશાળ પ્રેક્ષકો સાથે, ભારતમાં કોન્સર્ટ અર્થતંત્રના વિકાસ માટે અપાર સંભાવનાઓ છે. તેમણે પોતાના શબ્દોમાં કહ્યું કે, વિશ્વના મહાન કલાકારો ભારત તરફ આકર્ષિત થઈ રહ્યા છે. કોન્સર્ટ અર્થતંત્ર પણ પ્રવાસનને વેગ આપે છે અને મોટી સંખ્યામાં નોકરીઓનું સર્જન કરે છે.

પીએમ મોદીએ કહ્યું કે, આજે ભારત કરોડો લોકોની આકાંક્ષાઓથી પ્રેરિત થઈને વિકાસના માર્ગ પર આગળ વધી રહ્યું છે. તેમણે કહ્યું કે, આજે ભારત વિકાસના એવા માર્ગ પર આગળ વધી રહ્યું છે જે કરોડો લોકોની આકાંક્ષાઓથી પ્રેરિત છે. ફક્ત AI... કૃત્રિમ બુદ્ધિ જ નહીં પરંતુ ભારતની આકાંક્ષાઓ પણ આપણી તાકાત છે. ઉલ્લેખનીય છે કે, 'ઉત્કર્ષ ઓડિશા, મેક-ઇન-ઓડિશા કોન્ક્લેવ' એ ઓડિશા સરકાર દ્વારા આયોજિત એક મુખ્ય વૈશ્વિક રોકાણ સમિટ છે જેનો ઉદ્દેશ્ય રાજ્યને પૂર્વોદય વિઝનના કેન્દ્રસ્થાને અને ભારતમાં એક અગ્રણી રોકાણ સ્થળ અને ઔદ્યોગિક કેન્દ્ર તરીકે સ્થાપિત કરવાનો છે. ઓડિશા બે દિવસીય સમિટ દ્વારા રૂ. ૫ લાખ કરોડથી વધુના રોકાણ આકર્ષિત કરવાનું લક્ષ્ય રાખે છે, જેમાં ૩.૫ લાખ નોકરીઓનું સર્જન થવાનો અંદાજ છે.

આવી સ્થિતિમાં, આ કાર્યક્રમે રોકાણ અને વ્યવસાયની તકો માટે એક સમૃદ્ધ કેન્દ્ર તરીકે રાજ્યની અપાર સંભાવનાઓ દર્શાવી છે. રાજ્ય મોટા ઔદ્યોગિક પરિવર્તન માટે તૈયારી કરી રહ્યું હોવાથી, આ પરિષદમાં ઔદ્યોગિક માળખાને મજબૂત બનાવવા અને 2036 સુધીમાં દેશના ટોચના પાંચ આર્થિક રાજ્યોમાં ઓડિશાને સ્થાન આપવા પર ધ્યાન કેન્દ્રિત કરવામાં આવ્યું હતું. ભારત અને અન્ય 12 દેશોના રાજદૂતો, રોકાણકારો અને ઉદ્યોગપતિઓ સહિત 7,000 થી વધુ પ્રતિનિધિઓ આ સમિટમાં ભાગ લઈ રહ્યા છે.