ભારતને મળ્યો નવો 'સ્ટીવ સ્મિથ', તેની બેટિંગ શૈલી જોઈને તમે ચોંકી જશો

ઓસ્ટ્રેલિયાના ભૂતપૂર્વ કેપ્ટન સ્ટીવ સ્મિથ પોતાની વિચિત્ર બેટિંગ શૈલી માટે જાણીતો છે. તે હંમેશા ક્રીઝ પર આગળ-પાછળ ફરીને શોટ રમે છે અને આ રણનીતિ તેના માટે કામ કરી ગઈ છે. હવે સોશિયલ મીડિયા પર એક વીડિયો સામે આવ્યો છે, જેમાં એક યુવા ભારતીય ખેલાડી પણ આ જ શૈલીમાં બેટિંગ કરીને ચર્ચામાં આવી રહ્યો છે. સ્મિથની શૈલીનું અનુકરણ કરવું ખૂબ મુશ્કેલ છે, પરંતુ આ યુવાન ભારતીયની શૈલીએ ઇન્ટરનેટ પર ધૂમ મચાવી દીધી છે.

આંતરરાષ્ટ્રીય ક્રિકેટ મેચોમાં અમ્પાયરિંગ કરતા રિચાર્ડ કેટલબરોએ આ વીડિયો ક્લિપ શેર કરી છે. જેમાં જોઈ શકાય છે કે, આ યુવા બેટ્સમેન બોલનો બચાવ કર્યા પછી બેટને કેવી રીતે આગળ બતાવી રહ્યો છે, જેમ સ્ટીવ સ્મિથ કરે છે. ત્યારબાદ તેણે બોલને ઓફ સ્ટમ્પની બહાર છોડી દેવા માટે એક વિચિત્ર પદ્ધતિ અપનાવી. તેની બેટિંગ સ્ટાન્સ પણ સ્ટીવ સ્મિથ જેવી જ હતી. આના પરથી સમજી શકાય છે કે ભારતમાં ફક્ત વિરાટ કોહલી અને રોહિત શર્માના જ નહીં, પણ સ્ટીવ સ્મિથના પણ ચાહકો છે.

ભારત સામે બોર્ડર-ગાવસ્કર ટ્રોફી શરૂ થાય તે પહેલાં, સ્ટીવ સ્મિથે તેની ટેસ્ટ કારકિર્દીમાં 9,685 રન બનાવ્યા હતા અને તેને 10,000 રનનો આંકડો પાર કરવા માટે 315 રનની જરૂર હતી. ભારત સામેની શ્રેણીના અંત સુધીમાં, તેણે 5 મેચમાં 2 સદી સહિત 314 રન બનાવ્યા હતા. આનો અર્થ એ થયો કે સ્મિથ ટેસ્ટ ક્રિકેટમાં 10,000 રનના આંકડે પહોંચવાથી માત્ર એક રન દૂર છે. તે ટૂંક સમયમાં ઓસ્ટ્રેલિયાનો 15મો અને ટેસ્ટ મેચોમાં 10 હજાર રન બનાવનાર ચોથો ખેલાડી બનશે. તેની ટેસ્ટ સરેરાશ 55.86 છે અને તેણે 34 સદી અને 41 અડધી સદી ફટકારી છે.