ગાંધીનગરમાં હવે ભૂગર્ભ ગટરની સફાઈ રોબોટથી કરાશે
- ગાંધીનગર મ્યુનિ.ને બે નવા બેન્ડિકૂટ રોબોટની મળી ભેટ,
- હવે સફાઈ કામદારોને ગટરમાં ઉતરવું નહીં પડે,
- રોબોટ ગટરના 40 ટકા નેટવર્કને આવરી લેશે
ગાંધીનગરઃ શહેરની વસતી સાથે વિસ્તારમાં પણ વધારો થયો જાય છે. શહેરમાં ભૂગર્ભ ગટરના સાફાઈના કામ માટે સફાઈ કામદારોને ગટરમાં ઉતારવામાં આવતા હતા. અને ગટરમાં ઝેરી ગેસને લીધે ખૂબ તકેદીરી રાખવી પડતી હતી. ભૂગર્ભ ગટરની સફાઈનું કામ અઘરૂ છે. ત્યારે મ્યુનિ.કોર્પરેશનને સીએસઆર પ્રોજેક્ટ હેઠળ આઇ.આઇ.ટી. મદ્રાસ દ્વારા નિર્મિત બે બેન્ડીકૂટ રોબોટ આપવામાં આવ્યા છે. જે અન્વયે સફાઈ કામદારોને ગટરની સફાઈ માટે ગટરમાં ઉતરવાની અનેકવિધ તકલીફોથી મુક્તિ મળશે. અને ભૂગર્ભ ગટરની સારીરીતે સફાઈ કરી શકાશે.
ગાંધીનગર મ્યુનિ.કોર્પોરેશનને કોલ ઇન્ડિયા લિમિટેડના કોર્પોરેટ સામાજિક જવાબદારી (સીએસઆર) પ્રોજેક્ટ હેઠળ બેન્ડીકૂટ રોબોટની ભેટ આપવામાં આવી છે. આ પ્રસંગે કોલ ઇન્ડિયા લિમિટેડના સ્વતંત્ર ડાયરેક્ટર પુનમ મકવાણાએ જણાવ્યું હતું કે, કોલ ઇન્ડિયા સ્વચ્છતા અને જાહેર કલ્યાણને વધારવાના ગુજરાતના પ્રયાસો સાથે સુસંગત ક્લીનટેક પ્રોજેક્ટ્સને સમર્થન આપવા માટે સમર્પિત છે. આ પહેલ દ્વારા અમે મેન્યુઅલ સ્કેવેન્જિંગથી પ્રભાવિત લોકોનું પુનર્વસન કરવાનો પણ ધ્યેય રાખીએ છીએ. તેમને સલામત અને વધુ ટકાઉ રોજગારીની તકો પૂરી પાડીએ છીએ. આ રોબોટ્સનો ઉદ્દેશ્ય શહેરની ગટર વ્યવસ્થાને આધુનિક બનાવવાનો અને સ્વચ્છતા કર્મચારીઓ માટે સલામત કાર્ય પરિસ્થિતિઓ સુનિશ્ચિત કરવાનો છે.
આ રોબોટ્સ માનવ હસ્તક્ષેપ વગર મેનહોલ સાફ કરવા માટે રચાયેલા છે. જેનાથી હાથથી ગટર સાફ કરનારને અસુરક્ષિત વાતાવરણમાં પ્રવેશવાની જરૂરિયાત દૂર થાય છે. મેનહોલ સાફ કરવું એ એક ખૂબ જ જોખમી અને જીવલેણ કામ છે. બેન્ડીકૂટ રોબોટ્સ કામદારોની સલામતી અને સ્વચ્છતા પ્રથાઓના આધુનિકીકરણ બંનેને સંબોધિત કરે છે. આ રોબોટ્સ ગાંધીનગરના આશરે 40% ગટર નેટવર્કને આવરી લેશે. જ્યારે અગાઉ હાથથી ગટર સાફ કરવાની પ્રથામાં સામેલ લોકોને સલામત અને વધુ ગૌરવપૂર્ણ ભૂમિકાઓમાં રૂપાંતરિત કરવામાં આવશે.
