મણિપુરમાં ભારે વરસાદને પગલે જીનજીવન ખોરવાયું, 19811 લોકોને અસર

ઇમ્ફાલઃ મણિપુરમાં નદીઓના પાણીના પ્રવાહ અને બંધ તૂટવાથી આવેલા પૂરથી 19000 થી વધુ લોકો પ્રભાવિત થયા છે. અધિકારીઓએ જણાવ્યું હતું કે છેલ્લા ચાર દિવસથી સતત મુશળધાર વરસાદને કારણે આવેલા પૂરથી 3365 ઘરોને નુકસાન થયું છે અને 19811 લોકો પ્રભાવિત થયા છે. લોકોને ઘરો અને અસરગ્રસ્ત વિસ્તારોમાંથી બહાર કાઢીને 31 રાહત શિબિરોમાં લઈ જવામાં આવ્યા છે. આ રાહત શિબિરો મુખ્યત્વે ઇમ્ફાલ પૂર્વ જિલ્લામાં સ્થાપિત કરવામાં આવ્યા છે.

ઇમ્ફાલ પૂર્વ જિલ્લાના હેઇગાંગ, વાંગખેઇ અને ખુરાઇ વિધાનસભા મતવિસ્તાર સૌથી વધુ પ્રભાવિત છે. આ ઉપરાંત સેનાપતિ જિલ્લો પણ પૂરથી પ્રભાવિત છે. છેલ્લા ચાર દિવસમાં રાજ્યના વિવિધ ભાગોમાં ભૂસ્ખલનની 47 ઘટનાઓ પણ બની છે. તેમણે કહ્યું કે નદીનું પાણીનું સ્તર વધ્યા બાદ ખુરાઇ, હેઇગાંગ અને ચેકોન વિસ્તારોમાં પૂરના પાણી ભરાઈ ગયા છે.

એક અધિકારીએ જણાવ્યું હતું કે ચેકોન વિસ્તારમાં ઇમ્ફાલ નદી છલકાઈ ગયા પછી, ઓલ ઇન્ડિયા રેડિયો ઇમ્ફાલ કેમ્પસ અને જવાહરલાલ નેહરુ ઇન્સ્ટિટ્યૂટ ઓફ મેડિકલ સાયન્સિસ સહિત ઘણી ઓફિસો, આરોગ્ય કેન્દ્રો અને સંસ્થાઓના પરિસરમાં પાણી ભરાઈ ગયા હોવાના અહેવાલ છે. તેમણે કહ્યું કે ઇમ્ફાલ પૂર્વ જિલ્લાના પોરમપટ ખાતે સ્થિત જવાહરલાલ નેહરુ ઇન્સ્ટિટ્યૂટ ઓફ મેડિકલ સાયન્સિસ કેમ્પસમાં પૂરનું પાણી ઘૂસ્યા બાદ, રવિવારે સાંજે ત્યાં દાખલ થયેલા ઘણા દર્દીઓને અન્ય હોસ્પિટલોમાં ખસેડવામાં આવ્યા હતા.

અધિકારીએ જણાવ્યું હતું કે ગ્રાઉન્ડ ફ્લોર પર સ્થિત મહિલા ઓર્થોપેડિક અને સર્જરી વોર્ડમાં પૂરનું પાણી ઘૂસ્યા બાદ, સ્થાનિક ક્લબો, સ્વયંસેવકો, રાજ્ય આપત્તિ પ્રતિભાવ દળ (SDRF) અને રાષ્ટ્રીય આપત્તિ પ્રતિભાવ દળ (NDRF) ના કર્મચારીઓએ સાથે મળીને દર્દીઓને ત્યાંથી બહાર કાઢ્યા અને તેમને અન્ય હોસ્પિટલોમાં લઈ ગયા હતા.

તેમણે જણાવ્યું હતું કે, મણિપુરના રાજ્યપાલ અજય કુમાર ભલ્લાએ ઇમ્ફાલ શહેરના અનેક ડૂબી ગયેલા વિસ્તારોની મુલાકાત લીધી હતી, જ્યારે સેના અને આસામ રાઇફલ્સના જવાનોએ સૌથી વધુ અસરગ્રસ્ત જિલ્લા ઇમ્ફાલ પૂર્વમાં ડૂબી ગયેલા વિસ્તારોમાંથી લગભગ 800 લોકોને બચાવ્યા હતા. રાજભવન દ્વારા જારી કરાયેલા એક નિવેદનમાં કહેવામાં આવ્યું છે કે ભલ્લા, મુખ્ય સચિવ પી.કે. સિંહ અને અન્ય વરિષ્ઠ અધિકારીઓએ ઇમ્ફાલમાં કાંગલા નોંગપોક થોંગ, લૈરીકિએંગબામ લીકાઇ અને સિંગજામેઇ બ્રિજની મુલાકાત લીધી અને એકંદર પરિસ્થિતિનું મૂલ્યાંકન કર્યું હતું.

ઇમ્ફાલ પૂર્વ જિલ્લામાં ઇરિલ નદીનું પાણીનું સ્તર ભયના નિશાનને વટાવી ગયું છે, પરંતુ તે હજુ સુધી પાળાઓને વટાવી શક્યું નથી. સતત વરસાદને ધ્યાનમાં રાખીને, રાજ્યપાલે ઇમ્ફાલ પૂર્વ અને પશ્ચિમ જિલ્લાઓ અને સેનાપતિ જિલ્લાના સેનાપતિ સબ-ડિવિઝનની શાળાઓમાં ઉનાળાની રજા આગામી આદેશ સુધી લંબાવવાની જાહેરાત કરી છે.

અધિકારીઓએ જણાવ્યું હતું કે વ્યૂલેન્ડ કોલોની નજીક સેનાપતિ નદીમાં પાણી ભરાઈ જવાને કારણે સેનાપતિ જિલ્લાના ઘણા ભાગો પ્રભાવિત થયા છે. ભારતીય સેના અને આસામ રાઇફલ્સના સૈનિકોએ શનિવારે લગભગ 800 નાગરિકોને સુરક્ષિત સ્થળોએ ખસેડ્યા હતા, એક નિવેદનમાં જણાવાયું છે. ઇમ્ફાલ પૂર્વ જિલ્લાના પોરોમપટ, વાનખેઈ, સંજેન્થોંગ, પેલેસ કમ્પાઉન્ડ, ન્યૂ ચેકોંગ, ખુરાઈ હેઇક્રામાખોંગ હેનાંગ, સોઇબામ લેઇકાઈ, વાંગખેઈ અંગોમ લેઇકાઈ, નોંગમેઇબ્યુંગ રાજ બારી અને નજીકના વિસ્તારોમાં આસામ રાઇફલ્સના સૈનિકોને ઝડપી પ્રતિક્રિયા ટીમો સાથે તૈનાત કરવામાં આવ્યા છે.