ઉત્તરથી લઈને મધ્ય અને દક્ષિણ ભારતમાં છેલ્લા બે દિવસથી ગરમીનો પ્રકોપ

નવી દિલ્હી: ઉત્તરથી લઈને મધ્ય અને દક્ષિણ ભારતમાં છેલ્લા બે દિવસથી આકરી ગરમીનો પ્રકોપ જારી છે. માર્ચ મહિનામાં જૂન મહિના જેવો અનુભવ થવા લાગ્યો છે, પણ હવે તેજ અને ઠંડા પવનોથી થોડી રાહત મળતી જણાય છે. જો કે આ ફેરફાર માત્ર ઉત્તર ભારતમાં જ જોવા મળશે. મધ્ય ભારતમાં હજુ પણ ગરમીનો પ્રકોપ ચાલુ રહેશે અને તાપમાનમાં વધારો થતો રહેશે. આ ફેરફાર તાજેતરની વેસ્ટર્ન ડિસ્ટર્બન્સને કારણે થશે.

હવામાનની આગાહી કરતી એજન્સી, સ્કાયમેટના જણાવ્યા અનુસાર, ઉત્તરીય મેદાનોમાં આગામી 3-4 દિવસમાં તાપમાન 3 ડિગ્રી સેલ્સિયસથી 4 ડિગ્રી સેલ્સિયસ સુધી ઘટવાની શક્યતા છે. તે જ સમયે, મધ્ય ભારતમાં તાપમાન વધશે. મહારાષ્ટ્ર અને ગુજરાતના મોટાભાગના ભાગો, ખાસ કરીને દરિયાકાંઠાના અને આંતરિક વિસ્તારોમાં તાપમાનમાં 2°C થી 3°C નો વધારો જોવા મળી શકે છે. આગામી સપ્તાહની શરૂઆતમાં આ સ્થિતિ સ્થિર થઈ શકે છે.

ગુરુવારે દિલ્હીમાં મહત્તમ તાપમાન 36.4 ડિગ્રી સેલ્સિયસ નોંધાયું હતું, જે આ સિઝનની સરેરાશ કરતાં 3.8 ડિગ્રી વધુ છે. IMD અનુસાર, લઘુત્તમ તાપમાન 19.5 ડિગ્રી સેલ્સિયસ હતું, જે આ સિઝનની સરેરાશ કરતાં 1.4 ડિગ્રી વધુ છે. પરંતુ આજે લઘુત્તમ તાપમાન 18 ડિગ્રી અને મહત્તમ તાપમાન 33 ડિગ્રી સેલ્સિયસ રહી શકે છે. IMDએ શુક્રવારે દિવસ દરમિયાન ભારે પવનની આગાહી કરી છે.

અન્ય રાજ્યોની વાત કરીએ તો ગિલગિટ-બાલ્ટિસ્તાન, મુઝફ્ફરાબાદ, લદ્દાખ અને જમ્મુ-કાશ્મીરમાં હળવાથી મધ્યમ વરસાદની સાથે કેટલાક સ્થળોએ ભારે વરસાદની શક્યતા છે. હિમાચલ પ્રદેશમાં કેટલાક સ્થળોએ હળવાથી મધ્યમ વરસાદ અને છૂટાછવાયા હિમવર્ષા થઈ શકે છે. આગામી 2 થી 3 દિવસ દરમિયાન પૂર્વ ભારતના ભાગોમાં મહત્તમ તાપમાનમાં ધીમે ધીમે વધારો થશે અને ત્યારબાદ ઘટાડો થશે. કેરળ અને દક્ષિણ કર્ણાટકમાં હળવાથી મધ્યમ વરસાદની શક્યતા છે.