પીએમ મોદીની મુલાકાત પૂર્વે કેનેડામાં ખાલિસ્તાની સમર્થકો સામે સરકારે શરૂ કર્યું ઓપરેશન

નવી દિલ્હીઃ પ્રધાનમંત્રી નરેન્દ્ર મોદી G7 સમિટમાં ભાગ લેવા માટે કેનેડા જઈ રહ્યા છે. પીએમ મોદીની આ મુલાકાત પહેલા, માર્ક કાર્નીની સરકાર ખાલિસ્તાનીઓ વિરુદ્ધ ઝુંબેશ ચલાવી રહી છે. સરકાર ભારત વિરોધી પ્રવૃત્તિઓમાં સામેલ ખાલિસ્તાનીઓને પકડવા માટે પ્રોજેક્ટ પેલિકન નામનું ઓપરેશન ચલાવી રહી છે. આ ઝુંબેશ હેઠળ, કેનેડિયન પોલીસે એક મોટા ડ્રગ અને આતંકવાદી નેટવર્કનો પર્દાફાશ કર્યો છે, જેનો ખાલિસ્તાન સમર્થકો સાથે શંકાસ્પદ સંબંધ છે. પોલીસે કેનેડામાં અત્યાર સુધીનો સૌથી મોટો ડ્રગ જપ્ત કર્યો છે, જેમાં 479 કિલો કોકેનનો સમાવેશ થાય છે. તેની કિંમત 47.9 મિલિયન ડોલર છે. કેનેડામાં રહેતા સાત ભારતીય મૂળના લોકો સહિત નવ લોકોની ધરપકડ કરવામાં આવી છે.

પોલીસના જણાવ્યા અનુસાર, આ જૂથ અમેરિકા અને કેનેડા વચ્ચેના કોમર્શિયલ ટ્રકિંગ રૂટનો ઉપયોગ કરતું હતું. તેના મેક્સીકન ડ્રગ કાર્ટેલ અને અમેરિકન વિતરકો સાથે સંબંધો હતા. એવું કહેવામાં આવ્યું હતું કે ડ્રગના વેપારમાંથી મેળવેલા નાણાંનો ઉપયોગ વિરોધ પ્રદર્શન, લોકમત અને શસ્ત્રોની ખરીદી જેવી ભારત વિરોધી પ્રવૃત્તિઓ માટે થઈ રહ્યો છે. ગુપ્તચર એજન્સીઓને શંકા છે કે પાકિસ્તાનની ISI આ નેટવર્કને ટેકો આપી રહી છે, જે કેનેડામાં ખાલિસ્તાની જૂથોનો ઉપયોગ મેક્સીકન કોકેન અને અફઘાન હેરોઈનની દાણચોરી માટે કરી રહી છે. ધરપકડ કરાયેલા લોકોમાં સજીત યોગેન્દ્રરાજા (ઉ.વ. 31), મનપ્રીત સિંહ (ઉ.વ. 44), ફિલિપ ટેપ (ઉ.વ. 39), અરવિંદર પોવાર (ઉ.વ. 29), કરમજીત સિંહ (ઉ.વ. 36), ગુરતેજ સિંહ (ઉ.વ. 36), સરતાજ સિંહ (ઉ.વ. 27), શિવ ઓમકાર સિંહ (ઉ.વ. 31) અને હાઓ ટોમી હુયન્હ (ઉ.વ. 27)નો સમાવેશ થાય છે.

આ કાર્યવાહી એવા સમયે કરવામાં આવી છે જ્યારે પ્રધાનમંત્રી નરેન્દ્ર મોદી આ મહિનાના અંતમાં કેનેડાના કનાનાસ્કિસમાં G7 સમિટમાં હાજરી આપવાના છે. તેમની મુલાકાત કેનેડાના પ્રધાનમંત્રી માર્ક કાર્નીના આમંત્રણ બાદ થઈ રહી છે. સોશિયલ મીડિયા પર શેર કરાયેલી એક પોસ્ટમાં, પીએમ મોદીએ કાર્નેને તેમની તાજેતરની ચૂંટણી જીત બદલ અભિનંદન આપ્યા અને સમિટમાં આમંત્રણ બદલ તેમનો આભાર માન્યો હતો. તેમણે કહ્યું કે ભારત અને કેનેડા, મજબૂત સંબંધો ધરાવતા જીવંત લોકશાહી દેશો તરીકે, નવી ઉર્જા અને સહિયારા લક્ષ્યો સાથે મળીને કામ કરશે. પીએમ મોદીએ કહ્યું કે તેઓ સમિટમાં કાર્નેને મળવા માટે આતુર છે.

G7 સમિટ ઉપરાંત, પીએમ મોદી અને કાર્ને પણ મળશે. તેમની મુલાકાતમાં ખાલિસ્તાનનો મુદ્દો ઉઠાવી શકાય છે. ભારત ખાલિસ્તાનીઓ સામે ઝડપી કાર્યવાહી કરવાની માંગ કરી શકે છે. જસ્ટિસ ટ્રુડોના કાર્યકાળ દરમિયાન, કેનેડામાં ખાલિસ્તાનીઓનું મનોબળ ઊંચું હતું. ટ્રુડોની નીતિઓને કારણે ભારત અને કેનેડા વચ્ચેના સંબંધો બગડ્યા. પીએમ તરીકે, ટ્રુડોએ ખાલિસ્તાન તરફી નિજ્જર માટે અવાજ ઉઠાવ્યો અને કોઈપણ પુરાવા વિના ભારત પર આરોપ લગાવ્યા. ભારત સાથે છેડછાડ કરવી ટ્રુડો માટે મોંઘી સાબિત થઈ અને તેમણે સત્તા ગુમાવી દીધી.