શ્રીલંકાના ભૂતપૂર્વ રાષ્ટ્રપતિ રાનિલ વિક્રમસિંઘેની ભ્રષ્ટાચારના આરોપોમાં ધરપકડ

શ્રીલંકાના ભૂતપૂર્વ રાષ્ટ્રપતિ રાનિલ વિક્રમસિંઘેની ભ્રષ્ટાચારના આરોપસર ધરપકડ કરવામાં આવી હતી. અહેવાલ મુજબ, સપ્ટેમ્બર 2023 માં બ્રિટિશ યુનિવર્સિટીમાં તેમની પત્નીના સન્માનમાં આયોજિત સમારોહમાં હાજરી આપવા માટે લંડનની તેમની યાત્રા અંગે પૂછપરછ કરવામાં આવ્યા બાદ વિક્રમસિંઘેની અટકાયત કરવામાં આવી હતી.

અહેવાલ મુજબ, એક અધિકારીએ જણાવ્યું હતું કે તેમને કોલંબો ફોર્ટ મેજિસ્ટ્રેટ સમક્ષ રજૂ કરવામાં આવશે. તેમણે વધુમાં જણાવ્યું હતું કે વિક્રમસિંઘે પર દેશના સંસાધનોનો ઉપયોગ વ્યક્તિગત હેતુઓ માટે કરવાનો આરોપ છે.

વિક્રમસિંઘેની ધરપકડ કેમ કરવામાં આવી?
2023 માં હવાનાથી પાછા ફરતી વખતે રાનિલ વિક્રમસિંઘે લંડનમાં રોકાયા હતા, જ્યાં તેમણે G-77 સમિટમાં હાજરી આપી હતી. વિક્રમસિંઘે અને તેમની પત્ની મૈત્રી વોલ્વરહેમ્પ્ટન યુનિવર્સિટીમાં એક સમારોહમાં હાજરી આપી હતી. વિક્રમસિંઘેએ કહ્યું હતું કે તેમની પત્નીએ તેમની યાત્રાનો ખર્ચ પોતે ઉઠાવ્યો હતો અને તેના માટે કોઈ સરકારી પૈસાનો ઉપયોગ કરવામાં આવ્યો ન હતો.

પોલીસે આરોપ લગાવ્યો હતો કે વિક્રમસિંઘેએ સરકારી પૈસાનો ઉપયોગ વ્યક્તિગત મુસાફરી માટે કર્યો હતો. પોલીસના જણાવ્યા અનુસાર, તપાસમાં જાણવા મળ્યું છે કે રાનિલ વિક્રમસિંઘેના બોડીગાર્ડને પણ સરકારી તિજોરીમાંથી પગાર મળતો હતો. આ બાબતે પોતાનું નિવેદન નોંધાવવા માટે, વિક્રમસિંઘે CID ઓફિસ પહોંચ્યા હતા જ્યાં તેમની ધરપકડ કરવામાં આવી હતી.

ત્રણ વર્ષ પહેલા શ્રીલંકાના રાષ્ટ્રપતિ બન્યા હતા
વિક્રમસિંઘેએ જુલાઈ 2022 માં ગોટાબાયા રાજપક્ષેનો કાર્યકાળ પૂર્ણ કરવા માટે રાષ્ટ્રપતિ પદ સંભાળ્યું. ભ્રષ્ટાચારના આરોપોને લઈને રાજપક્ષે વિરુદ્ધ સમગ્ર શ્રીલંકામાં વિરોધ પ્રદર્શનો થયા હતા, જેના કારણે રાજપક્ષેને રાજીનામું આપવું પડ્યું હતું. 2022 માં શ્રીલંકાના સૌથી ખરાબ નાણાકીય સંકટ પછી દેશની અર્થવ્યવસ્થાને સ્થિર કરવાનો શ્રેય વિક્રમસિંઘેને આપવામાં આવે છે, પરંતુ સપ્ટેમ્બરમાં તેઓ ફરીથી ચૂંટણી હારી ગયા.