અમેરિકામાં સરકારના શટડાઉનથી ખોરાક સહાય બંધ થવાની શક્યતા, કરોડો નાગરિકોની મુશ્કેલીઓ વધશે

અમેરિકામાં એક ઑક્ટોબરથી શરૂ થયેલું સરકારનું શટડાઉન હવે જનજીવન પર સીધી અસર કરતું જોવા મળી રહ્યું છે. કૃષિ વિભાગ (USDA)એ જાહેરાત કરી છે કે 1 નવેમ્બરથી ફેડરલ ફૂડ સહાય ભથ્થા આપવામાં નહીં આવે, જેનાથી લાખો પરિવારોને રોજિંદા ખોરાક માટે સંકટ સર્જાઈ શકે છે.

અમેરિકામાં 1 ઑક્ટોબરથી શરૂ થયેલું સરકારનું શટડાઉન હવે સામાન્ય જનતા માટે મુશ્કેલીઓ ઉભી કરી રહ્યું છે. કરોડો નાગરિકો માટે ચાલી રહેલા મફત ખોરાક સહાય કાર્યક્રમો પર ગંભીર સંકટ ઊભું થયું છે. ટ્રમ્પ પ્રશાસન દ્વારા જાહેર કરાયેલા એક નવા નોટિસ મુજબ 1 નવેમ્બરથી કોઈ પણ પ્રકારની ફેડરલ ફૂડ સહાય આપવામાં નહીં આવે. અમેરિકાના કૃષિ વિભાગ (USDA)એ પોતાની સત્તાવાર વેબસાઇટ પર નોટિસ જાહેર કરી છે, જેમાં જણાવાયું છે કે સરકારના બંધને કારણે 1 નવેમ્બરથી ફેડરલ ફૂડ સહાય ભથ્થા આપવામાં નહીં આવે. આ જાહેરાતે દેશભરના લાખો પરિવારો માટે ગંભીર આર્થિક અને ખાદ્ય સંકટ ઊભું કર્યું છે, કારણ કે સરકારનું આ બંધ હવે રેકોર્ડ સ્તર સુધી પહોંચી ગયું છે.

ટ્રમ્પ પ્રશાસનની આ જાહેરાત પછી સ્પષ્ટ થયું છે કે સરકારે “પુરક પોષણ સહાય કાર્યક્રમ” જેને સામાન્ય રીતે ફૂડ સ્ટેમ્પ્સ તરીકે ઓળખવામાં આવે છે, માટે રાખવામાં આવેલી આશરે 5 અબજ અમેરિકી ડોલરની તાત્કાલિક નાણાકીય સહાયનો ઉપયોગ નવેમ્બર સુધી કરવામાં નહીં આવે. આ યોજના હેઠળ અમેરિકાના દર આઠમા નાગરિકને રોજિંદા જીવન માટે જરૂરી ખાદ્ય વસ્તુઓ ખરીદવામાં મદદ મળે છે.

યુએસડીએના નોટિસમાં લખાયું છે, “હકીકત એ છે કે ઉપલબ્ધ નાણાં સમાપ્ત થઈ ચૂક્યાં છે. હાલની પરિસ્થિતિમાં 1 નવેમ્બરથી કોઈ પણ પ્રકારનો ભથ્થો આપવામાં આવશે નહીં. અમે હવે સેનેટ ડેમોક્રેટ્સ માટે એક નિર્ણાયક તબક્કે પહોંચી ગયા છીએ.” નોંધનીય છે કે 1 ઑક્ટોબરથી શરૂ થયેલું આ સરકારનું શટડાઉન હવે અમેરિકાના ઈતિહાસમાં બીજું સૌથી લાંબું શટડાઉન બની ગયું છે.

જોકે રિપબ્લિકન પ્રશાસને આ મહિનાની SNAP સહાયની ચુકવણી શટડાઉન શરૂ થાય તે પહેલાં સુનિશ્ચિત કરી હતી, પરંતુ જો આગામી કેટલાક દિવસોમાં રાજકીય સમાધાન ન મળે, તો આ નાણાકીય કપાતનો ગંભીર પ્રભાવ લાખો અમેરિકન નાગરિકો પર પડશે, ખાસ કરીને એવા પરિવારો પર જે પહેલેથી જ આર્થિક રીતે નબળા છે.

આ સંકટને ધ્યાનમાં રાખીને ડેમોક્રેટિક સાંસદોએ કૃષિ સચિવ બ્રુક રોલિન્સને પત્ર લખીને આગામી મહિનાના લાભોની ચુકવણી માટે તાત્કાલિક નાણાકીય સહાયનો ઉપયોગ કરવાની વિનંતી કરી છે. જોકે, શુક્રવારે બહાર પડેલા યુએસડીએના દસ્તાવેજમાં જણાવાયું છે કે નિયમિત લાભો માટે આ ફંડનો ઉપયોગ કાનૂની રીતે શક્ય નથી, કારણ કે આ નાણાં માત્ર આપત્તિગ્રસ્ત વિસ્તારોમાં મદદ માટે જ ફાળવવામાં આવ્યા છે. પરિણામે, લાખો પરિવારોને આગામી મહિનાથી ખોરાક સહાય ન મળવાની શક્યતા ઊભી થઈ છે, જેના કારણે ડેમોક્રેટ અને રિપબ્લિકન બંને પક્ષો દ્વારા શાસિત રાજ્યોમાં ચિંતા ફેલાઈ છે.