ભારત સામેની પહેલી T20 મેચમાં ઇંગ્લેન્ડની મહિલા ટીમને દંડ
ઇંગ્લેન્ડની મહિલા ટીમને ભારત સામે રમાયેલી પહેલી T20 મેચમાં હારનો સામનો કરવો પડ્યો હતો. હારની સાથે જ ઇંગ્લેન્ડની ટીમને ધીમા ઓવર રેટ માટે મેચ ફીના 10 ટકા દંડ ફટકારવામાં આવ્યો છે. બોલિંગ દરમિયાન ઇંગ્લેન્ડે નિર્ધારિત સમયમાં બે ઓવર ઓછી ફેંકી હતી. આ કારણે ટીમને દંડ ફટકારવામાં આવ્યો હતો. ICC ઇન્ટરનેશનલ મેચ રેફરી પેનલના હેલેન પેકે આ દંડ ફટકાર્યો હતો.
ફિલ્ડ અમ્પાયર જેક્લીન વિલિયમ્સ અને જેમ્સ મિડલબ્રુક, થર્ડ અમ્પાયર સુ રેડફર્ન અને ફોર્થ અમ્પાયર અન્ના હેરિસે આ દંડ ફટકાર્યો હતો. ઇંગ્લેન્ડની કેપ્ટન નેટ સાયવર-બ્રન્ટે ગુનો અને પ્રસ્તાવિત દંડ સ્વીકાર્યો હતો, તેથી ઔપચારિક સુનાવણીની કોઈ જરૂર નહોતી. ICC આચાર સંહિતાના વિભાગ 2.22 મુજબ, જે ન્યૂનતમ ઓવર રેટ સાથે સંબંધિત છે, ખેલાડીઓને તેમની ટીમ નિર્ધારિત સમયમાં બોલિંગ કરવામાં નિષ્ફળ રહે તે દરેક ઓવર માટે તેમની મેચ ફીના પાંચ ટકા દંડ ફટકારવામાં આવે છે.
નોટિંગહામમાં રમાયેલી મેચમાં, ઇંગ્લેન્ડે ટોસ જીતીને પ્રથમ બોલિંગ કરવાનો નિર્ણય લીધો. કેપ્ટન સ્મૃતિ મંધાનાની પહેલી T20 સદી (62 બોલમાં 112 રન) ની મદદથી ભારતીય ટીમે 5 વિકેટે 210 રનનો વિશાળ સ્કોર બનાવ્યો. સ્મૃતિ મંધાના સદી ફટકારતાની સાથે જ ત્રણેય ફોર્મેટમાં સદી ફટકારનાર પ્રથમ ભારતીય મહિલા બેટ્સમેન બની.
ભારતીય ટીમે ઇંગ્લેન્ડ સામે T20નો સૌથી મોટો સ્કોર બનાવ્યો. 211 રનના લક્ષ્યાંકનો પીછો કરતી ઇંગ્લેન્ડ ભારતીય ટીમની ઘાતક બોલિંગ સામે માત્ર 14.5 ઓવરમાં 113 રનમાં ઓલઆઉટ થઈ ગઈ અને 97 રનથી હારી ગઈ. આ ફોર્મેટમાં રન તફાવતની દ્રષ્ટિએ ઇંગ્લેન્ડનો આ સૌથી મોટો પરાજય હતો. ભારતીય ટીમની નિયમિત કેપ્ટન હરમનપ્રીત કૌર આ મેચમાં રમી ન હતી. તે ઈજાને કારણે બહાર થઈ ગઈ હતી. તેથી જ મંધાનાએ તેના સ્થાને કેપ્ટનશીપ કરી.
