ભારતમાં ઇ-વાહનોનું વેચાણ આ દાયકાના અંત સુધીમાં 10 મિલિયન યુનિટ સુધી પહોંચવાની અપેક્ષા

કેન્દ્રીય પર્યાવરણ મંત્રી ભૂપેન્દ્ર યાદવે જણાવ્યું હતું કે, 2030 સુધીમાં કુલ વાહનોના વેચાણમાં ઇલેક્ટ્રિક વાહનોનો હિસ્સો 50 ટકા હોવો જોઈએ. 2070 સુધીમાં ચોખ્ખા શૂન્ય ઉત્સર્જન હાંસલ કરવાના માર્ગ પર ઓટોમોટિવ ક્ષેત્ર આગળ વધે. સોસાયટી ઓફ ઇન્ડિયન ઓટોમોબાઇલ મેન્યુફેક્ચરર્સ (SIAM) દ્વારા આયોજિત સસ્ટેનેબિલિટી સર્ક્યુલરિટી પરના ત્રીજા આંતરરાષ્ટ્રીય પરિષદને સંબોધતા, યાદવે એમ પણ કહ્યું કે ભારત હવે કેટલાક દેશોની વસ્તી કરતાં વાર્ષિક વધુ કાર વેચે છે. પરંતુ આ સિદ્ધિ હવાને સ્વચ્છ રાખવા અને પર્યાવરણને સ્વસ્થ રાખવાની જવાબદારી સાથે આવે છે.

"વાહનોના વેચાણમાં વધારો એ અર્થતંત્ર માટે સારા સમાચાર છે, અને જો આપણે સાથે મળીને કામ કરીએ, તો આપણે ખાતરી કરી શકીએ છીએ કે તે પર્યાવરણ માટે પણ ખરાબ સમાચાર નથી," તેમણે કહ્યું.

મંત્રીએ જણાવ્યું હતું કે 2030 સુધીમાં EV નું વેચાણ કુલ વાહનોના વેચાણના લગભગ 35 ટકા સુધી પહોંચવાનો અંદાજ છે. "ઓટો સેક્ટરને તેના 2070 ના ચોખ્ખા-શૂન્ય લક્ષ્યાંક સાથે ટ્રેક પર જવા માટે, આ હિસ્સો 50 ટકા સુધી પહોંચવાની જરૂર છે," તેમણે ઉમેર્યું હતું. મંત્રીએ જણાવ્યું હતું કે, ભારતમાં ઇલેક્ટ્રિક વાહનોનું વેચાણ આ દાયકાના અંત સુધીમાં 10 મિલિયન યુનિટ સુધી પહોંચવાની અપેક્ષા છે, જેનાથી 50 લાખ નોકરીઓનું સર્જન થશે.

તેમણે કહ્યું કે ઇલેક્ટ્રિક વાહનોનો કાફલો 2030 સુધીમાં CO2 ઉત્સર્જનમાં પાંચ મેટ્રિક ટનનો ઘટાડો કરી શકે છે, અને આ ઘટાડો 2050 સુધીમાં વધીને 110-380 મેટ્રિક ટન થઈ શકે છે. યાદવે કહ્યું કે ઇલેક્ટ્રિક વાહનો પર્યાવરણને અનુકૂળ છે કારણ કે તે પ્રદૂષણ ફેલાવતા નથી, પરંતુ એ નોંધવું મહત્વપૂર્ણ છે કે તેમની બેટરી વીજળી દ્વારા ચાર્જ થાય છે.