મહિલા IPS અધિકારી તરીકે ઓળખ આપીને લોકો સાથે ઠગાઈ કરતા સાઈબર ઠગ ઝડપાયો
ભોપાલઃ મધ્યપ્રદેશની જબલપુર પોલીસે યુપી પોલીસની મદદથી એક ભેજાબાજ ઠગની ધરપકડ કરી છે. આરોપી ટેકનોલોજી અને ચાલાકીની મદદથી યુપી, રાજસ્થાન અને ગુજરાતમાં મહિલા આઈપીએસ અધિકારી તરીકે ઓળખ આપીને સાયબર છેતરપિંડી કરતો હતો. આશ્ચર્યજનક વાત એ છે કે આરોપી માત્ર 19 વર્ષનો છે અને માત્ર 9મું પાસ છે. તે છોકરીઓના અવાજમાં ફસાવીને લોકો સાથે છેતરપિંડી આચરતો હતો. આરોપીની ઓળખ સંકેત યાદવ તરીકે થઈ છે, જે મધ્યપ્રદેશના જબલપુર જિલ્લાના પાટણ પોલીસ સ્ટેશન હેઠળના થાપક મોહલ્લાનો રહેવાસી છે.
સુત્રોના જણાવ્યા અનુસાર, સંકેત યાદવ મહિલા અધિકારીઓના અવાજમાં ખૂબ જ કુશળતાથી વાત કરતો હતો. તે પોલીસ સ્ટેશનોમાં ફોન કરીને પોતાને એક વરિષ્ઠ મહિલા આઈપીએસ અધિકારી તરીકે ઓળખાવતો હતો અને કહેતો હતો કે તેના વિસ્તારમાં કાર્યરત ગ્રાહક સેવા કેન્દ્ર (સીએસપી) માંથી ગેરકાયદેસર પૈસાની લેવડદેવડ થઈ રહી છે. તે સંબંધિત પોલીસ સ્ટેશનના ઇન્ચાર્જને કમાન્ડિંગ ભાષામાં સૂચના આપતો હતો કે તાત્કાલિક કેન્દ્રની તપાસ કરો અને તેને ઓપરેટર સાથે વાત કરાવો. જ્યારે ઓપરેટર ફોન પર આવતો હતો, ત્યારે સંકેત તેને આઈપીએસ તરીકે ઓળખ આપીને ધમકી આપતો હતો કે પોલીસ કાર્યવાહી કરશે. ધરપકડથી બચવા માટે, તે QR કોડ મોકલવાની અને 10,000 રૂપિયા ટ્રાન્સફર કરાવવાની વાત કરતો.
પૂછપરછ દરમિયાન, સંકેતે જણાવ્યું કે, તે ઉજ્જૈનના મહાકાલ મંદિરમાં સફાઈ કામદાર તરીકે કામ કરતો હતો. ત્યાં તેણે VIP મુવમેન્ટ દરમિયાન પોલીસ અધિકારીઓ અને કોન્સ્ટેબલોની વાતચીતને નજીકથી જોઈ. અહીંથી જ તેણે અધિકારીઓની ભાષા, શૈલી અને બોલવાની રીત શીખી. બાદમાં, તેણે ગ્રાહક સેવા કેન્દ્રમાં પણ કામ કર્યું, જ્યાંથી તેને ગેરકાયદેસર વ્યવહારોની પ્રક્રિયા વિશે માહિતી મળી. સંકેતે ખુલાસો કર્યો કે એક વખત તે મજાકમાં કોઈની સાથે મહિલાના અવાજમાં વાત કરતો હતો અને બીજી વ્યક્તિને શંકા ન થતી. ત્યાંથી તેને છેતરપિંડીનો આ અનોખો વિચાર આવ્યો. આ પછી, તેણે ગૂગલ પરથી મહિલા IPS અધિકારીઓનો પ્રોફાઇલ ફોટો ડાઉનલોડ કરીને ટ્રુ કોલર અને વોટ્સએપ ડીપી પર મૂક્યો, જેથી કોલ રીસીવરને તેના પર શંકા ન થાય.
સુત્રોના જણાવ્યા અનુસાર, સંકેત 15 વર્ષની ઉંમરે ઘર છોડી ગયો હતો. તેના પિતા ઉમાશંકર એક અપંગ વ્યક્તિ છે અને તેની માતા પાટણમાં એક નાની ચાની દુકાન ચલાવે છે. 2021 માં તે ઉજ્જૈન ગયો અને ત્યાંથી તેની છેતરપિંડીની વાર્તા શરૂ થઈ. કાસગંજ પોલીસે 15 જુલાઈના રોજ રેલવે સ્ટેશન પરથી સંકેતની ધરપકડ કરી હતી જ્યારે તે એસપી અંકિતા શર્માના નામનો ઉપયોગ કરીને મથુરા પોલીસને ગેરમાર્ગે દોરતો હતો. પોલીસ રેકોર્ડમાં ખુલાસો થયો છે કે સંકેતની અગાઉ સાયબર છેતરપિંડીના કેસમાં ધરપકડ કરવામાં આવી છે. તેને 25 જૂને બદાયૂં જેલમાંથી મુક્ત કરવામાં આવ્યો હતો.
હવે યુપી અને એમપી સાયબર સેલ સંયુક્ત રીતે તેની પૂછપરછ કરી રહી છે. પોલીસને શંકા છે કે તેણે મધ્યપ્રદેશમાં પણ આવા ઘણા ગુનાઓ કર્યા હશે. તપાસ એજન્સીઓ એ શોધવાનો પ્રયાસ કરી રહી છે કે સંકેતની પાછળ કોઈ મોટી ગેંગ છે કે તે એકલો જ આ છેતરપિંડી કરતો રહ્યો. સંકેત યાદવની ધરપકડ સાથે, આજના ડિજિટલ વિશ્વમાં છેતરપિંડી કરનારાઓ ટેકનિકલ જ્ઞાન અને ચાલાકી દ્વારા લોકોને અને પોલીસને પણ ગેરમાર્ગે દોરવા માટે કેટલી હદ સુધી જઈ શકે છે તે સ્પષ્ટ થઈ ગયું છે. પોલીસ હવે QR કોડ દ્વારા મળેલી ટ્રાન્ઝેક્શન માહિતીના આધારે છેતરપિંડીની આખી સ્ટોરીનો ખુલાસો કરવામાં વ્યસ્ત છે.