કોંગ્રેસ હંમેશા અનામત વિરોધી રહી છેઃ ભાજપા

• અનામત મામલે રાહુલ ગાંધીએ અમેરિકામાં કર્યું નિવેદન
• રાહુલ ગાંધીના નિવેદનનો માયાવતીએ વિરોધ કર્યો
• ભાજપાએ પણ રાહુલ ગાંધીના નિવેદન મામલે માયાવતીને આપ્યું સમર્થન

લખનૌઃ ઉત્તર પ્રદેશના પૂર્વ મુખ્યમંત્રી માયાવતીએ અનામત અંગે કોંગ્રેસના નેતા રાહુલ ગાંધીના નિવેદન સામે વાંધો વ્યક્ત કર્યો છે. ભારતીય જનતા પાર્ટીએ આ મુદ્દે બહુજન સમાજ પાર્ટીના સુપ્રીમોને સમર્થન આપ્યું છે. રાહુલ ગાંધીએ તેમના યુએસ પ્રવાસ દરમિયાન કહ્યું છે કે, જ્યારે ભારતમાં અનામતને લઈને નિષ્પક્ષતા હશે ત્યારે અમે અનામતને ખતમ કરવા વિશે વિચારીશું. હવે માયાવતીએ તેના પર વાંધો ઉઠાવ્યો છે. આ પછી બીજેપી સાંસદ બ્રિજલાલે કહ્યું છે કે, માયાવતી બિલકુલ સાચા છે. કોંગ્રેસ હંમેશા અનામત વિરોધી રહી છે.

તેમણે દાવો કર્યો હતો કે, પૂર્વ વડાપ્રધાન જવાહર લાલ નેહરુએ મુખ્યમંત્રીઓને અનામત ખતમ કરવા માટે પત્ર લખ્યો હતો. ભાજપના સાંસદે કહ્યું કે, છેલ્લી લોકસભાની ચૂંટણીમાં કોંગ્રેસે અનામત ખતમ કરવાનો ભ્રમ ફેલાવીને કેટલીક બેઠકો જીતી લીધી છે, પરંતુ દર વખતે આ શક્ય નહીં બને. બસપા ચીફ માયાવતીએ સોશિયલ મીડિયા સાઈટ પર લખ્યું હતું કે, હવે કોંગ્રેસ પાર્ટીના નેતા રાહુલ ગાંધીના આ ડ્રામાથી સાવધાન રહો જેમાં તેમણે વિદેશમાં કહ્યું છે કે જ્યારે ભારતની સ્થિતિ વધુ સારી હશે ત્યારે અમે SC, ST, OBCનું અનામત ખતમ કરીશું.

માયાવતીએ કહ્યું હતું કે, આનાથી સ્પષ્ટ થાય છે કે કોંગ્રેસ વર્ષોથી તેમની આરક્ષણ ખતમ કરવાના ષડયંત્રમાં લાગેલી છે, કોંગ્રેસ નેતા રાહુલ ગાંધીના આ ઘાતક નિવેદનથી સાવધાન રહેવું જોઈએ, કારણ કે આ પાર્ટી કેન્દ્રમાં સતામાં આવતાની સાથે જ  આ નિવેદનની આડમાં, તેઓ ચોક્કસપણે તેમનું આરક્ષણ સમાપ્ત કરશે. આ લોકો બંધારણ અને અનામત બચાવવાનું નાટક કરી રહી છે. પરંતુ વાસ્તવમાં કોંગ્રેસ શરૂઆતથી જ અનામત વિરોધી વિચારસરણી ધરાવે છે.

બીએસપી નેતાએ કહ્યું હતું કે એકંદરે, જ્યાં સુધી દેશમાંથી જાતિવાદ સંપૂર્ણપણે નાબૂદ ન થાય ત્યાં સુધી, ભારતની પ્રમાણમાં સારી સ્થિતિ હોવા છતાં, આ વર્ગોની સામાજિક, આર્થિક અને શૈક્ષણિક સ્થિતિમાં સુધારો થવાનો નથી. તેથી જ્યાં સુધી જ્ઞાતિવાદનો સંપૂર્ણ નાશ ન થાય ત્યાં સુધી અનામતની યોગ્ય બંધારણીય વ્યવસ્થા ચાલુ રાખવી જરૂરી છે.