છત્તીસગઢ: સુકમામાં સુરક્ષા દળો અને નક્સલીઓ વચ્ચે અથડામણ, બે નક્સલીઓ ઠાર મરાયાં

સુકમાઃ છત્તીસગઢના સુકમા જિલ્લામાં સુરક્ષા દળો અને નક્સલીઓ વચ્ચે થયેલી અથડામણમાં બે નક્સલીઓ માર્યા ગયા છે. પોલીસ અધિકારીઓએ જણાવ્યું કે, જિલ્લાના કિસ્તારામ પોલીસ સ્ટેશન વિસ્તારમાં સુરક્ષા દળો અને નક્સલવાદીઓ વચ્ચે એન્કાઉન્ટર ચાલી રહ્યું છે. સુરક્ષા દળોએ અત્યાર સુધીમાં બે નક્સલીઓના મૃતદેહ બહાર કાઢ્યા છે.

તેમણે કહ્યું કે, કિસ્તારામ વિસ્તારમાં નક્સલવાદીઓની હાજરીની માહિતી પર સુકમા ડિસ્ટ્રિક્ટ રિઝર્વ ગાર્ડ (DRG) અને સેન્ટ્રલ રિઝર્વ પોલીસ ફોર્સની કોબ્રા બટાલિયનની સંયુક્ત ટીમને નક્સલ વિરોધી કાર્યવાહી પર મોકલવામાં આવી હતી. અધિકારીઓએ જણાવ્યું હતું કે આજે જ્યારે ટીમ આ વિસ્તારમાં હતી, ત્યારે નક્સલીઓએ સુરક્ષા દળો પર ગોળીબાર શરૂ કર્યો હતો, જેના પછી જવાબી કાર્યવાહી કરવામાં આવી હતી.

તેમણે કહ્યું કે આજે સવારથી સુરક્ષા દળો અને નક્સલવાદીઓ વચ્ચે સમયાંતરે અથડામણ ચાલી રહી છે. અત્યાર સુધીમાં બે નક્સલીઓના મૃતદેહ મળી આવ્યા છે. અધિકારીઓએ જણાવ્યું હતું કે સુરક્ષા દળોએ એન્કાઉન્ટર સ્થળ અને આસપાસના વિસ્તારોમાં શોધખોળ અભિયાન શરૂ કર્યું છે.