ચેલ્સીએ યુઈએફએ કોન્ફરન્સ લીગ જીતીને યુરોપિયન ક્લબ ટ્રોફીનો સેટ પૂર્ણ કર્યો

પોલેન્ડના રક્લા સ્ટેડિયમમાં ચેલ્સીએ રીઅલ બેટિસને 4-1થી હરાવ્યું. આ સાથે, ચેલ્સીએ પાંચેય યુરોપિયન ક્લબ ટ્રોફી જીતનાર પ્રથમ ટીમ બનીને ઇતિહાસ રચ્યો છે. કોલ પામરના બીજા હાફના શાનદાર પ્રદર્શનથી ચેલ્સીએ આ સિદ્ધિ હાંસલ કરી.

યુઈએફએ ચેમ્પિયન્સ લીગમાં બે, યુઈએફએ યુરોપા લીગમાં બે, યુઈએફએ સુપર કપમાં બે અને યુઈએફએ કપ વિનર્સ કપમાં બે જીત પછી ચેલ્સીની આ પહેલી કોન્ફરન્સ લીગ સફળતા છે. જોકે, વિનર્સ કપ હવે યોજાતો નથી. આ સિઝનમાં યુઈએફએ કોન્ફરન્સ લીગમાં ચેલ્સીના કુલ 42 ગોલ સ્પર્ધા માટે એક રેકોર્ડ છે. આ સાથે, ચેલ્સીએ 2022/23 સીઝનમાં ફિઓરેન્ટીનાના કુલ 37 ગોલને વટાવી દીધા.

મેચની 9મી મિનિટે અબ્દે અજલઝૌલીના શાનદાર ગોલથી બેટિસને લીડ મળી. ટીમ 65મી મિનિટ સુધી આગળ હતી, પરંતુ તે પછી ચેલ્સીએ સતત ચાર ગોલ કરીને ટાઇટલ મેચ 4-1થી જીતી લીધી. ચેલ્સીના કેપ્ટન એન્ઝો ફર્નાન્ડીઝે 65મી મિનિટમાં ગોલ કર્યો. તે કોલ પામરના પાસને હેડરથી ગોલ પોસ્ટની અંદર મોકલવામાં સફળ રહ્યો.

પહેલા ગોલના 5 મિનિટ પછી, નિકોલસ જેક્સનના ગોલે ચેલ્સીને 2-1ની લીડ અપાવી. આ ગોલમાં પામરે પણ ભૂમિકા ભજવી. મેચની 83મી મિનિટે સબસ્ટિટ્યુટ જોર્ડન સાન્ચોએ ગોલ કર્યો, ત્યારબાદ મોઇસેસ કૈસેડોએ ઇન્જરી ટાઇમમાં ગોલ કરીને ચેલ્સીને 4-1થી આગળ કરી દીધી.