ચેમ્પિયન્સ ટ્રોફીઃ 16 વર્ષમાં પ્રથમવાર ગ્રુપ સ્ટેજમાં જ યજમાન પાકિસ્તાની ટીમ ટૂર્નામેન્ટમાંથી બહાર થઈ

નવી દિલ્હીઃ ચેમ્પિયન્સ ટ્રોફી 2025 ના ગ્રુપ સ્ટેજમાં ડિફેન્ડિંગ ચેમ્પિયન અને યજમાન પાકિસ્તાનની સફરનો અંત આવ્યો છે. બાંગ્લાદેશ પર ન્યૂઝીલેન્ડની પાંચ વિકેટથી જીત સાથે, પાકિસ્તાનની બધી આશાઓ પર પાણી ફરી વળ્યું અને ભારત અને ન્યૂઝીલેન્ડ ગ્રુપ A માંથી સેમિફાઇનલમાં પહોંચવામાં સફળ રહ્યા છે. મોહમ્મદ રિઝવાનની આગેવાની હેઠળની પાકિસ્તાની ટીમ શરૂઆતની બંને મેચમાં પડકાર ઉભો કરી શકી ન હતી અને ઘણી ભૂલો કરી હતી જેના પરિણામ તેને ભોગવવા પડ્યા હતા. રસપ્રદ વાત એ છે કે, આ ICC ટુર્નામેન્ટ 19 ફેબ્રુઆરીએ શરૂ થઈ હતી અને યજમાન ટીમની સફર માત્ર છ દિવસ પછી સમાપ્ત થઈ ગઈ હતી.

ટુર્નામેન્ટની શરૂઆત પહેલા પાકિસ્તાનને એક મોટો ફટકો પડ્યો જ્યારે તેનો સ્ટાર ઓપનર સૈમ અયુબ ઈજામાંથી સ્વસ્થ થઈ શક્યો નહીં અને ચેમ્પિયન્સ ટ્રોફીમાંથી બહાર થઈ ગયો હતો. તેમના સ્થાને ટીમમાં સામેલ કરાયેલા ફખર ઝમાનને ન્યુઝીલેન્ડ સામેની પહેલી મેચના બીજા બોલ પર ફિલ્ડિંગ કરતી વખતે ઈજા થઈ હતી અને તેથી તે ભારત સામેની મેચ માટે ઉપલબ્ધ નહોતો. બોલિંગ વિભાગ પણ એટલો પ્રભાવશાળી નહોતો કારણ કે ઝડપી બોલરો શાહીન આફ્રિદી અને નસીમ શાહ વિરોધી બેટ્સમેનોને મુશ્કેલીમાં મુકવામાં નિષ્ફળ રહ્યા છે.

પાકિસ્તાનની ટીમ પાસે અબરાર અહેમદના રૂપમાં ફક્ત એક જ નિષ્ણાત બોલર હતો, પરંતુ બીજા છેડે તેને ટેકો આપવા માટે સ્પિનરનો અભાવ હતો. પાકિસ્તાનના ખરાબ પ્રદર્શનનું આ પણ એક કારણ હતું. ટુર્નામેન્ટ શરૂ થાય તે પહેલાં, પાકિસ્તાને તેના ઘરઆંગણે દક્ષિણ આફ્રિકા અને પાકિસ્તાન સામે ત્રિકોણીય શ્રેણીમાં ભાગ લીધો હતો પરંતુ ફાઇનલમાં હારી ગયું હતું. આ ટીમ કાગળ પર નબળી દેખાતી હતી, પરંતુ એવું માનવામાં આવતું હતું કે પાકિસ્તાન ઘરઆંગણે થોડી તાકાત બતાવી શકે છે. જોકે, રિઝવાનની ટીમ કોઈપણ વિભાગમાં સારું પ્રદર્શન કરી શકી નહીં.

પાકિસ્તાન સામેની મેચમાં ન્યુઝીલેન્ડે 320 રન બનાવ્યા હતા જેમાં વિલ યંગ અને કેપ્ટન ટોમ લાથમે સદી ફટકારી હતી. બીજી મેચમાં પાકિસ્તાનનો સામનો ભારત સામે થયો જેમાં ટીમે ટોસ જીતીને પહેલા બેટિંગ કરવાનો નિર્ણય લીધો હતો. બાબર આઝમ અને ઇમામ-ઉલ-હકે પણ ટીમને સારી શરૂઆત આપી હતી, પરંતુ પાકિસ્તાન તેનો ફાયદો ઉઠાવવામાં નિષ્ફળ ગયું. ભારતીય બોલરોએ પાકિસ્તાનને 241 રનના સ્કોર પર રોકી દીધું અને લક્ષ્યનો પીછો કરતી વખતે, વિરાટ કોહલીએ જવાબદારી સંભાળી અને માત્ર 43.2 ઓવરમાં લક્ષ્ય હાંસલ કરી લીધું હતું. બે મેચ હાર્યા બાદ પાકિસ્તાનની આશાઓ ખતમ થઈ ગઈ હતી, પરંતુ બાંગ્લાદેશ પર ન્યુઝીલેન્ડની જીતથી તેની તકો સંપૂર્ણપણે નાશ પામી હતી.

આ સાથે, પાકિસ્તાને પોતાના નામે કેટલાક અનિચ્છનીય રેકોર્ડ નોંધાવ્યા છે. 2009 પછી આ પહેલી વાર છે જ્યારે ચેમ્પિયન્સ ટ્રોફીની યજમાન ટીમ ગ્રુપ સ્ટેજમાંથી બહાર થઈ ગઈ છે. છેલ્લી વખત આવું દક્ષિણ આફ્રિકા સાથે બન્યું હતું જ્યારે ટીમ ત્રણમાંથી બે મેચ હારી ગઈ હતી અને એક જીતી હતી. તે સમયે દક્ષિણ આફ્રિકાની ટીમ ગ્રુપમાં સૌથી નીચે હતી.

એટલું જ નહીં, પાકિસ્તાનની ટીમ છે જે ચેમ્પિયન્સ ટ્રોફીમાં ટાઇટલ બચાવવા માટે આવી હતી પરંતુ ગ્રુપ સ્ટેજમાં જ બહાર થઈ ગઈ હતી. આવું પહેલી વાર 2004માં બન્યું જ્યારે ભારત અને શ્રીલંકા ગ્રુપ સ્ટેજમાંથી બહાર થઈ ગયા. 2002 માં ભારત અને શ્રીલંકા આ ટુર્નામેન્ટના સંયુક્ત વિજેતા હતા. છેલ્લે આવું 2013 માં બન્યું હતું જ્યારે ડિફેન્ડિંગ ચેમ્પિયન ટીમ ગ્રુપ સ્ટેજમાં જ બહાર થઈ ગઈ હતી. તે સમયે ઓસ્ટ્રેલિયા એક પણ મેચ જીતી શક્યું ન હતું. પાકિસ્તાન હવે તેની છેલ્લી મેચ 27 ફેબ્રુઆરીએ રાવલપિંડીમાં બાંગ્લાદેશ સામે રમશે.