ભાવનગરથી હરિદ્વાર એક્સપ્રેસ ટ્રેન હવે સપ્તાહમાં બે દિવસ દોડશે

• રેલવે બોર્ડ દ્વારા ભાવનગર ડિવિઝનને આપી મંજુરી
• ભાવનગરથી સોમવારે અને ગુરૂવારે હરદ્વાર જવા ટ્રેન મળશે
• ટ્રેનનું સમયપત્રક અને સ્ટોપેજ ટુંક સમયમાં જાહેર કરાશે

ભાવનગરઃ રેલવે બોર્ડ દ્વારા ભાવનગર રેલ ડિવિઝનને ભાવનગર-હરિદ્વાર વચ્ચે સપ્તાહમાં બે દિવસ ટ્રેન દોડાવવાને મંજુરી આપી છે. આ ટ્રેન ભાવનગરથી સોમવારે અને ગુરૂવારે એમ સપ્તાહમાં બે દિવસ દોડશે. ટ્રેનનું સમયપત્રક યુંક સમયમાં જાહેર કરવામાં આવશે. ભાવનગરથી હરિદ્વાર જવા માટે સીધી ટ્રેનની સુવિધા મળશે તેથી પ્રવાસીઓને લાભ થશે.

ભારતિય રેલવે બોર્ડે યાત્રિયોની સુવિધામાં વધારો કરવાના હેતુથી પશ્ચિમ રેલવેના ભાવનગર ડિવિઝનમાંથી ચાલતી ભાવનગર - હરિદ્વાર - ભાવનગર એક્સપ્રેસ ટ્રેન 19271/19272ને અઠવાડિયામાં 2 દિવસ ચલાવવાની મંજૂરી આપી છે. હવે આ ટ્રેન ભાવનગર ટર્મિનસથી સોમવાર અને ગુરુવારે દોડશે. એટલે કે અઠવાડિયામાં 2 દિવસ ચાલશે. ભાવનગર ડિવિઝનના સિનિયર ડીસીએમ માશૂક અહમદના જણાવ્યા મુજબ અત્યાર સુધી ભાવનગરથી હરિદ્વાર જતી ટ્રેન ભાવનગર ટર્મિનસથી દર સોમવારે રાત્રે 20.20 વાગ્યે ઉપડે છે અને બુધવારે 03.40 વાગ્યે હરિદ્વાર પહોંચે છે. આ ટ્રેન બુધવારે સવારે 05.00 કલાકે હરિદ્વારથી ઉપડે છે અને ગુરુવારે સવારે 12.25 કલાકે ભાવનગર ટર્મિનસ પહોંચે છે. આ ટ્રેન કેટલા સ્ટેશનો પર સ્ટોપેજ કરશે તે હવે પછી જાહેર કરવામાં આવશે.

ભાવનગર ડિવિઝનલ રેલવે મેનેજર રવીશકુમારે જણાવ્યું કે, રેલવે બોર્ડની મંજૂરી મળ્યા બાદ હવે ભાવનગર ટર્મિનસથી દર સોમવાર અને ગુરુવારે તથા હરિદ્વારથી દર બુધવાર અને શનિવારે દોડશે. ગુરુવારે ભાવનગરથી હરિદ્વાર જતી ટ્રેન ટૂંક સમયમાં શરૂ થશે અને ટ્રેન અંગેની વિગતવાર માહિતી ટૂંક સમયમાં ઉપલબ્ધ કરાવાશે.