BCCI 2027 વર્લ્ડ ટેસ્ટ ચેમ્પિયનશિપ ફાઇનલ ભારતમાં યોજવા આતુર

ભારતીય ક્રિકેટ કંટ્રોલ બોર્ડ (BCCI) દેશમાં 2025-2027 ચક્રની વર્લ્ડ ટેસ્ટ ચેમ્પિયનશિપ (WTC) ફાઇનલનું આયોજન કરવાનું વિચારી રહ્યું છે. આ સંદર્ભમાં એક દરખાસ્ત પછીથી ઔપચારિક રીતે રજૂ કરવામાં આવશે. અગાઉ, WTC ની પ્રથમ આવૃત્તિની ફાઇનલ 2021 માં સાઉથમ્પ્ટનમાં અને બીજી આવૃત્તિની ફાઇનલ 2023 માં ઓવલ ખાતે રમાઈ હતી. તે જ સમયે, 2025 માં એટલે કે આ વર્ષે વર્લ્ડ ટેસ્ટ ચેમ્પિયનશિપની ફાઇનલ આવતા મહિને લોર્ડ્સમાં રમાશે.

સમાચાર એજન્સી પીટીઆઈ અનુસાર, ગયા મહિને ઝિમ્બાબ્વેમાં આઈસીસી ચીફ એક્ઝિક્યુટિવ્સ કમિટીની બેઠક દરમિયાન આ સંદર્ભમાં ચર્ચા થઈ હતી, જ્યાં બીસીસીઆઈનું પ્રતિનિધિત્વ આઈપીએલના ચેરમેન અરુણ ધુમલ દ્વારા કરવામાં આવ્યું હતું. ડિસેમ્બર 2024 માં ગ્રેગ બાર્કલે પાસેથી પદ સંભાળ્યા બાદ, BCCI ના ભૂતપૂર્વ સચિવ જય શાહ વર્તમાન ICC પ્રમુખ છે.

એક સૂત્રએ સંકેત આપ્યો, 'જો ભારત આગામી WTC ફાઇનલમાં પહોંચે છે, તો તે ચાહકો માટે એક મહાન પ્રસંગ હશે.' પરંતુ જો ભારત ફાઇનલમાં ન રમે તો પણ ઘણા લોકોને બે અન્ય ટોચની ટીમો વચ્ચેની મેચમાં રસ હશે. ભારત અત્યાર સુધીમાં બે વાર WTC ફાઇનલમાં પહોંચ્યું છે. ૨૦૨૧માં ન્યુઝીલેન્ડ અને ૨૦૨૩માં ઓસ્ટ્રેલિયા સામે તેનો પરાજય થયો હતો.

ભારતીય ટીમ આ આવૃત્તિ એટલે કે 2025 ની ફાઇનલ માટે ક્વોલિફાય થઈ શકી ન હતી. ન્યુઝીલેન્ડ અને પછી ઓસ્ટ્રેલિયા સામે શ્રેણી હાર્યા બાદ ટીમ વર્લ્ડ ટેસ્ટ ચેમ્પિયનશિપ ફાઇનલની રેસમાંથી બહાર થઈ ગઈ હતી. ભારતના નિયમિત ટેસ્ટ કેપ્ટન રોહિત શર્માએ ટેસ્ટમાંથી નિવૃત્તિ લઈ લીધી છે. આવી સ્થિતિમાં, ટીમ ઈન્ડિયા ટેસ્ટ ચેમ્પિયનશિપની નવી સીઝનમાં નવા કેપ્ટન સાથે પ્રવેશ કરશે. શુભમન ગિલ હાલમાં કેપ્ટનશીપની રેસમાં સૌથી આગળ છે.

ભારતીય ટીમ વર્લ્ડ ટેસ્ટ ચેમ્પિયનશિપ (WTC) ના 2025-27 ચક્રની શરૂઆત ઇંગ્લેન્ડ સામે પાંચ મેચની ટેસ્ટ શ્રેણી સાથે કરશે. પહેલી ટેસ્ટ મેચ 20 જૂનથી લીડ્સમાં રમાશે. ભારતે છેલ્લે 2021-22માં ઇંગ્લેન્ડનો પ્રવાસ કર્યો હતો. તે સમયે ટીમ વિરાટ કોહલીના નેતૃત્વમાં ટેસ્ટ શ્રેણી રમવા ગઈ હતી. જોકે, કોરોનાને કારણે પાંચમી ટેસ્ટ મોડી રમાઈ હતી અને બુમરાહએ તે સમયે કેપ્ટનશીપ કરી હતી. શ્રેણી ૨-૨ થી બરાબરીમાં સમાપ્ત થઈ.