ભારત સાથેના તણાવ વચ્ચે પાકિસ્તાનમાં બલોચ વિદ્રોહીઓએ મંગોચર ઉપર જમાવ્યો કબજો

નવી દિલ્હીઃ પહેલગામ આતંકવાદી હુમલા બાદ ભારત અને પાકિસ્તાન વચ્ચે તણાવ વધી રહ્યો છે. દરમિયાન, બાલોચ બળવાખોરોએ પાકિસ્તાનના બલુચિસ્તાનના કલાત જિલ્લામાં આવેલા મંગોચર શહેર પર કબજો કરી લીધો છે. સોશિયલ મીડિયા રિપોર્ટ્સ અનુસાર, બલૂચ બળવાખોરોએ મંગોચરમાં સરકારી કચેરીઓ અને ઇમારતો પર કબજો કરી લીધો છે. શનિવારે આનો એક વીડિયો પણ સામે આવ્યો હતો, જેમાં બલૂચ બળવાખોરોને સરકારી ઇમારતો પર દર્શાવવામાં આવ્યા છે. અહેવાલો અનુસાર, શહેરમાં બલૂચ બળવાખોરો અને પાકિસ્તાની સેના વચ્ચે અથડામણ થઈ છે. બલૂચ બળવાખોરોએ શહેરમાં પાકિસ્તાન આર્મી કેમ્પ પર હુમલો કર્યો હતો. બળવાખોરોએ પાકિસ્તાની સેના પાસેથી કેટલાક હથિયારો પણ જપ્ત કર્યા હોવાના અહેવાલ છે.

મંગોચર શહેરમાં પાકિસ્તાન આર્મી કેમ્પ પર બલૂચ બળવાખોરો દ્વારા હુમલાના આ અહેવાલો એવા સમયે આવ્યા છે જ્યારે ભારત સાથે તણાવ વધી રહ્યો છે. ભારત તરફથી હુમલાના ડરથી પાકિસ્તાની સેનાએ પશ્ચિમી સરહદ પર પોતાના સૈનિકો તૈનાત કર્યા હોવાના અહેવાલ છે.

છેલ્લા કેટલાક મહિનામાં, બલૂચ વિદ્રોહીઓએ બલૂચિસ્તાનમાં પાકિસ્તાની સુરક્ષા કર્મચારીઓ પર હુમલાઓ વધારી દીધા છે. 26 એપ્રિલના રોજ, પશ્ચિમ પાકિસ્તાનના બલુચિસ્તાન પ્રાંતમાં IED વિસ્ફોટમાં ઓછામાં ઓછા દસ અર્ધલશ્કરી જવાનો માર્યા ગયા હતા. બલૂચ લિબરેશન આર્મી (BLA) એ આ હુમલાની જવાબદારી સ્વીકારી હતી.

તાજેતરના પહેલગામ આતંકવાદી હુમલા પછી નવી દિલ્હી અને ઇસ્લામાબાદ વચ્ચેના રાજદ્વારી સંબંધોની સ્થિતિ વધુ બગડવા લાગી. 22 એપ્રિલના રોજ, પહેલગામ નજીક બૈસરન મેદાનમાં પાંચથી છ આતંકવાદીઓએ એક સ્થાનિક ગાઇડ સહિત 26 લોકોની હત્યા કરી હતી.

પાકિસ્તાન સ્થિત આતંકવાદી જૂથ લશ્કર-એ-તૈયબા (LeT) ના સહયોગી, રેઝિસ્ટન્સ ફ્રન્ટે શરૂઆતમાં હુમલાની જવાબદારી સ્વીકારી હતી. જોકે, થોડા દિવસો પછી તેણે પોતાની ભૂમિકાનો ઇનકાર કર્યો હતો. નોંધનીય છે કે પહેલગામ હુમલો પાકિસ્તાનના આર્મી ચીફ જનરલ અસીમ મુનીર દ્વારા કરવામાં આવેલી હિન્દુ વિરોધી ટિપ્પણીના લગભગ એક અઠવાડિયા પછી થયો હતો.