અમદાવાદમાં AMTS અને BRTSના પાસ હવે ઓનલાઈન કઢાવી શકાશે

• વિદ્યાર્થીઓને હવે પાસ કઢાવવા માટે લાઈનમાં ઊભા રહેવું નહીં પડે,
• વિદ્યાર્થીઓ માટે I pass Ahmedabad એપ્લિકેશન લોન્ચ કરી,
• વિદ્યાર્થીઓએ ઓનલાઈન ફી ભર્યા બાદ પાસ મોકલી દેવાશે

અમદાવાદઃ  મ્યુનિ.કોર્પોરેશન સંચાલિત એએમટીએસ અને બીઆરટીએસમાં વિદ્યાર્થીઓને પાસ કઢવવા માટે ભારે મુશ્કેલી પડા રહી છે. કલાકો સુધી લાઈનમાં ઊભી રહેવાની ફરજ પડતી હતી. પણ હવે એએમટીએસ અને બીઆરટીએસના કન્સેશન પાસ વિદ્યાર્થીઓને ઓનલાઈન કાઢી આપવામાં આવશે, જેના માટે I pass Ahmedabad એપ્લિકેશન લોન્ચ કરવામાં આવી છે. આ એપ્લિકેશનમાં વિદ્યાર્થીઓએ ફોર્મ ભરીને મોકલવાનું રહેશે. જે બાદ વિદ્યાર્થીઓએ ઓનલાઇન પાસની ફી ભરવાની રહેશે. ફી ભર્યા બાદ પાસ ઓનલાઇન જ મોકલી આપવામાં આવશે. આ પાસ ડાઉનલોડ કરી પોતાની પાસે રાખવાનો રહેશે. જો કોઈ વિદ્યાર્થી ફિઝિકલ પાસ કાઢવા માંગતો હતો તે પ્રિન્ટ કાઢીને પણ પોતાની પાસે રાખી શકશે.

એએમટીએસના  કમિટી ચેરમેન ધરમશી દેસાઈએ જણાવ્યું હતું કે એએમટીએસ બસમાં 50000થી વધારે વિદ્યાર્થીઓ કન્સેશન પાસ કઢાવીને મુસાફરી કરતા હોય છે. દર છ મહિને વિદ્યાર્થીઓને પાસ કઢાવવો પડે છે. ત્યારે તેઓને લાઈનમાં ઊભું રહેવું ન પડે તેના માટે મ્યુનિસિપલ કોર્પોરેશન દ્વારા નવી એપ્લિકેશન તૈયાર કરવામાં આવી છે. જે એપ્લિકેશનમાં વિદ્યાર્થી દ્વારા રજિસ્ટ્રેશન કરવાનું રહેશે. આ રજિસ્ટ્રેશન કર્યા બાદ વિદ્યાર્થીએ એએમટીએસ અને બીઆરટીએસ  બસ એમ બંનેના પાસ કઢાવી શકશે.

અમદાવાદ મ્યુનિસિપલ ટ્રાન્સપોર્ટ સર્વિસ (AMTS )દ્વારા રૂ.8 કરોડના ખર્ચે નવી ચાર ડબલ ડેકર એસી બસ ખરીદવામાં આવી છે. નવી આવનાર ડબલ ડેકર બસ રૂટ નંબર 130 નરોડાથી નારોલ, રૂટ નંબર 501 ઉજાલા સર્કલથી ત્રિમંદિર અને રૂટ નંબર 401 ત્રિમંદિરથી ઉજાલા સર્કલના રૂટ પર દોડાવવામાં આવશે. જ્યારે એક ડબલ ડેકર નિકોલ વિસ્તારમાં દોડાવવા માટે શક્યતા ચકાસાઈ રહી છે.