આતંકવાદ અને દેશના દુશ્મનો સામે તમામ ભારતીયોએ એક થવું જોઈએઃ નીતિન ગડકરી

નવી દિલ્હીઃ કેન્દ્રીય મંત્રી નીતિન ગડકરીએ યોગી આદિત્યનાથના 'બટેંગે તો કટંગે' ના નારાનો બચાવ કર્યો છે. તેમણે કહ્યું કે લોકોએ આ સૂત્રનું ખોટું અર્થઘટન ન કરવું જોઈએ અને દેશના દુશ્મનો અને આતંકવાદ સામે એક થવું જોઈએ. ગડકરીએ એવો પણ દાવો કર્યો હતો કે આગામી વિધાનસભા ચૂંટણીમાં રાજ્યમાં મહાયુતિ ગઠબંધન સરકાર સત્તામાં પરત ફરશે.

નીતિન ગડકરીએ વધુમાં જણાવ્યું હતું કે, 'આપણી પૂજાની પદ્ધતિઓ અલગ-અલગ હોઈ શકે છે, કેટલાક લોકો મંદિરમાં જાય છે, કેટલાક મસ્જિદમાં જાય છે અને કેટલાક ચર્ચમાં જાય છે, પરંતુ અંતે આપણે બધા ભારતીય છીએ. આપણે બટેંગે તો કાટેંગે સૂત્રનું ખોટું અર્થઘટન ન કરવું જોઈએ પરંતુ આતંકવાદ અને દેશના દુશ્મનો સામે એક થવું જોઈએ. તમામ ભારતીયોએ એક થવું જોઈએ અને આનો હેતુ કોઈને વિભાજિત કરવાનો નથી, પરંતુ દુઃખની વાત છે કે લોકો તેનું ખોટું અર્થઘટન કરી રહ્યા છે.

ઉત્તર પ્રદેશના સીએમ યોગી આદિત્યનાથે એક જાહેર સભામાં આ નારો આપ્યો હતો, જેને લઈને રાજકીય બયાનબાજી ચાલી રહી છે. ઘણા નેતાઓએ યોગી આદિત્યનાથના નારાનું સમર્થન કર્યું છે, તો ઘણા નેતાઓ એવા છે જેઓ તેમના નારાને લોકોમાં ભડકાઉ અને વિભાજનકારી ગણાવી રહ્યા છે. નીતિન ગડકરીએ મહારાષ્ટ્રમાં આગામી વિધાનસભા ચૂંટણીમાં મહાયુતિ ગઠબંધનની સરકાર બનાવવાનો દાવો કર્યો હતો.

ગડકરીએ કહ્યું કે લોકસભા ચૂંટણી દરમિયાન અલગ વાતાવરણ હતું, પરંતુ હવે વિધાનસભા ચૂંટણીમાં શિવસેના અને કોંગ્રેસના વિચારો મેળ ખાતા નથી. મહાગઠબંધન તરફથી સીએમ પદના ચહેરા અંગે ગડકરીએ કહ્યું હતું કે ચૂંટણી એકનાથ શિંદે, અજિત પવાર અને દેવેન્દ્ર ફડણવીસના નેતૃત્વમાં થઈ રહી છે અને ચૂંટણીઓ પછી આગામી નિર્ણય લેવામાં આવશે.