G-20માં ભાગ લીધા બાદ પીએમ મોદી બ્રાઝિલથી ગયાના પહોંચ્યા

નવી દિલ્હીઃ બ્રાઝિલમાં જી-20 સમિટમાં ભાગ લીધા બાદ પીએમ મોદી હવે ત્રણ દેશોની 5 દિવસની મુલાકાતના ભાગરૂપે ગયાના પહોંચ્યા છે. ગયાના પ્રમુખ ડૉ. મોહમ્મદ ઈરફાન અલીએ બુધવારે જ્યોર્જટાઉન પહોંચ્યા ત્યારે પીએમ મોદીનું ગળે લગાવીને સ્વાગત કર્યું.

બ્રાઝિલના રિયો ડી જાનેરોમાં G-20 સમિટમાં ભાગ લીધા બાદ પ્રધાનમંત્રી નરેન્દ્ર મોદી હવે ગયાના પહોંચી ગયા છે. ત્યાં પહોંચતા જ ગયાનાના રાષ્ટ્રપતિ મોહમ્મદ ઈરફાન અલીએ તેમને ગળે લગાવ્યા. ઇરફાન અલીએ ખુદ પીએમ મોદીનું સ્વાગત કર્યું અને ગયાનાની ધરતી પર પગ મૂકતાની સાથે જ ઉષ્માભર્યું સ્વાગત કર્યું.

પીએમ મોદી તેમના 5 દિવસના વિદેશ પ્રવાસ દરમિયાન તેમની છેલ્લી મુલાકાતે ગયાના પહોંચ્યા છે. આ પછી તે ભારત પરત ફરશે. તેમની મુલાકાત દરમિયાન પીએમ મોદી ગયાના સંસદની વિશેષ બેઠકને સંબોધિત કરશે. આ સિવાય તેઓ બીજી ઈન્ડિયા-કેરીકોમ સમિટમાં કેરેબિયન ભાગીદાર દેશોના નેતાઓ સાથે પણ જોડાશે.

પીએમ મોદી ગયાનાના રાષ્ટ્રપતિ ડૉ. મોહમ્મદ ઈરફાન સાથે જ્યોર્જ ટાઉનમાં વાતચીત કરશે. તેઓ બીજી કેરીકોમ-ઈન્ડિયા સમિટમાં પણ ભાગ લેશે. CARICOM એટલે કે કેરેબિયન કોમ્યુનિટી એન્ડ કોમન માર્કેટ એ 20 વિકાસશીલ દેશોનું જૂથ છે. પ્રધાનમંત્રી CARICOM સભ્ય દેશોના નેતાઓ સાથે બેઠક કરશે. આ મંત્રણામાં આ ક્ષેત્ર સાથે ભારતની લાંબા સમયથી ચાલતી મિત્રતાને વધુ મજબૂત કરવાના માર્ગો પર ચર્ચા થશે. પ્રધાનમંત્રી મોદી ગયાનાની સંસદને પણ સંબોધિત કરશે. તેમના પ્રવાસ દરમિયાન તેઓ ભારતીયોને પણ મળશે.