નકલી દસ્તાવેજના આધારે લેવાયેલા 80 લાખ સિમકાર્ડ એઆઈની મદદથી બ્લોક કરાયાં

સાયબર ક્રાઈમને કાબુમાં લેવા માટે ભારત સરકારે નકલી સિમ કાર્ડ સામે મોટી કાર્યવાહી કરી છે. આ પગલું ડિજિટલ સુરક્ષા સુનિશ્ચિત કરવાની દિશામાં એક મહત્વપૂર્ણ પ્રયાસ માનવામાં આવી રહ્યું છે. ડિપાર્ટમેન્ટ ઓફ ટેલિકોમ્યુનિકેશન્સ (DoT) એ AI નો ઉપયોગ કરીને બનાવટી દસ્તાવેજો પર જારી કરાયેલા 80 લાખથી વધુ સિમ કાર્ડ્સને બ્લોક કરી દીધા છે. તેનો હેતુ ગેરકાયદેસર પ્રવૃત્તિઓમાં આ સિમ કાર્ડનો ઉપયોગ અટકાવવાનો છે. નકલી સિમ કાર્ડ ઉપરાંત, સરકારે 6.78 લાખ મોબાઈલ નંબરો પણ બ્લોક કર્યા છે જે સાયબર ક્રાઈમમાં સીધા સામેલ હતા. આ પગલું ડિજિટલ છેતરપિંડી પર વ્યાપક કાર્યવાહીનો એક ભાગ છે, જે ટેલિકોમ સેવાઓને વધુ સુરક્ષિત બનાવવાના સરકારના સંકલ્પને દર્શાવે છે.

ટેલિકોમ્યુનિકેશન વિભાગે નકલી દસ્તાવેજો પર નોંધાયેલા મોબાઇલ નંબરને શોધવા માટે AI આધારિત ટેકનોલોજીનો ઉપયોગ કર્યો હતો. આ પહેલ હેઠળ, 78.33 લાખ નકલી મોબાઇલ નંબરની ઓળખ કરવામાં આવી હતી, જે હવે નિષ્ક્રિય કરી દેવામાં આવી છે. વિભાગે સોશિયલ મીડિયા પ્લેટફોર્મ "X" (અગાઉ ટ્વિટર) દ્વારા આ માહિતી આપી છે. કેન્દ્રીય સંચાર મંત્રી જ્યોતિરાદિત્ય સિંધિયાના જણાવ્યા અનુસાર, દૂરસંચાર વિભાગ અને ગૃહ મંત્રાલય વચ્ચેના સહકારે આ અભિયાનમાં મહત્વની ભૂમિકા ભજવી છે. ખાસ કરીને સાયબર ક્રાઈમ હેલ્પલાઈન 1930એ 10 લાખ લોકોની ફરિયાદોનું નિરાકરણ કરીને 3,500 કરોડ રૂપિયાની બચત કરવામાં મદદ કરી છે.