ઉત્તર કોરિયામાં ચોખા અને ડોલર ભરેલી બોટલ મોકલવાનો પ્રયાસ કરનાર 6 અમેરિકનોની ધરપકડ

દક્ષિણ કોરિયાની પોલીસે 6 અમેરિકન નાગરિકોની ધરપકડ કરી. આ લોકોએ 1 ડોલરની નોટો અને બાઈબલ ભરેલી હજારો પ્લાસ્ટિક બોટલો ઉત્તર કોરિયા મોકલવાનો પ્રયાસ કર્યો. તેઓ આ બોટલો પ્રતિબંધિત સરહદી વિસ્તાર નજીક સમુદ્ર દ્વારા છોડી દેવા માંગતા હતા. સિઓલથી લગભગ 50 કિલોમીટર દૂર ગાંગવા ટાપુના પ્રતિબંધિત વિસ્તારમાંથી 20 થી 50 વર્ષની વયના અમેરિકન નાગરિકોએ લગભગ 1,300 પ્લાસ્ટિક બોટલો સમુદ્રમાં છોડી દેવાનો પ્રયાસ કર્યો. આ બોટલો વિવિધ વસ્તુઓથી ભરેલી હતી.

જ્યારે આ વિસ્તારનું નિરીક્ષણ કરી રહેલા દરિયાકાંઠાના લશ્કરી એકમે તેમને જોયા, ત્યારે તેણે પોલીસને જાણ કરી. આ પછી, તેમને કસ્ટડીમાં લેવામાં આવ્યા અને આપત્તિ વ્યવસ્થાપન અને સુરક્ષા કાયદાનું ઉલ્લંઘન કરવાનો આરોપ મૂકવામાં આવ્યો. ગયા નવેમ્બરથી આ વિસ્તારને જોખમી ક્ષેત્ર જાહેર કરવામાં આવ્યો છે, તેથી સામાન્ય લોકોને ત્યાં જવાની મનાઈ છે. પ્યોંગયાંગ વિરુદ્ધ પેમ્ફલેટ વિતરણ કરવા પર પણ પ્રતિબંધ છે. યોનહાપ ન્યૂઝ એજન્સી અનુસાર, પોલીસે કહ્યું છે કે આ અમેરિકન નાગરિકોની હાલ ધરપકડ કરવામાં આવશે નહીં. અટકાયત કર્યા વિના તેમની તપાસ કરવામાં આવશે, કારણ કે તેમના કાર્ય માટે ધરપકડ વોરંટની જરૂર નથી.

પોલીસને જાણવા મળ્યું છે કે આ લોકો ઇંચિયોનમાં કોઈપણ નાગરિક કે ધાર્મિક જૂથ સાથે સંકળાયેલા નથી. હવે પોલીસ તપાસ કરી રહી છે કે તેમનો દક્ષિણ કોરિયાની અંદર કે બહાર કોઈ અન્ય સંગઠન સાથે કોઈ સંબંધ છે કે નહીં. એક પોલીસ અધિકારીએ કહ્યું, "અમે તેમને મુક્ત કરવા જઈ રહ્યા છીએ, કારણ કે અમને નથી લાગતું કે આ પરિસ્થિતિમાં ધરપકડ વોરંટની જરૂર છે. અમે અટકાયત કર્યા વિના તેમની તપાસ ચાલુ રાખવાની યોજના બનાવી રહ્યા છીએ."

ઉત્તર કોરિયાથી દક્ષિણ કોરિયા ભાગી ગયેલા કેટલાક જૂથોએ પણ આવી બોટલો અગાઉ સરહદ નજીક સમુદ્રમાં છોડી દીધી છે. તેમનું કહેવું છે કે આ બોટલો ઉત્તર કોરિયાના ગરીબ લોકોને માનવતાવાદી સહાય પૂરી પાડવા માટે મોકલવામાં આવી હતી. દક્ષિણ કોરિયાના નવા રાષ્ટ્રપતિ લી જે-મ્યુંગે, જેમણે આ મહિને પદ સંભાળ્યું, તેમણે આદેશ આપ્યો છે કે ઉત્તર કોરિયા વિરોધી પત્રિકાઓ વહેંચવાના પ્રયાસો બંધ કરવામાં આવે અને જે લોકો આમ કરે છે તેમને કાયદા હેઠળ સજા કરવામાં આવે. તેઓ ઉત્તર કોરિયા સાથે સંબંધો સુધારવા માંગે છે.