ભારતમાં એક મહિનામાં 22,91,621 વાહનોનું વેચાણ, પેસેન્જર વાહનના વેચાણમાં 16 ટકાની વૃદ્ધિ

ફેડરેશન ઓફ ઓટોમોબાઈલ ડીલર્સ એસોસિએશન (FADA) એ જાન્યુઆરી 2025 માટે ઓટોમોબાઈલ વેચાણના આંકડા જાહેર કર્યા છે. જાન્યુઆરીમાં ભારતીય બજારમાં કુલ 22,91,621 વાહનોનું વેચાણ થયું હતું, જેમાં વાર્ષિક ધોરણે 7% નો વધારો નોંધાયો હતો. FADA એ જણાવ્યું હતું કે ગયા મહિને, દરેક વાહન સેગમેન્ટ - ટુ-વ્હીલર, થ્રી-વ્હીલર, ફોર-વ્હીલર, ટ્રેક્ટર અને કોમર્શિયલ વાહનમાં સકારાત્મક ગતિ જોવા મળી હતી.

જાન્યુઆરી 2025 માં પેસેન્જર વાહનોના વેચાણમાં વધારો થયો હતા. ગયા મહિને પેસેન્જર વાહન સેગમેન્ટમાં કુલ વાહન વેચાણ 4,65,920 યુનિટ રહ્યું હતું, જે 16% ની વૃદ્ધિ દર્શાવે છે. FADA એ જણાવ્યું હતું કે, ઘણા ડીલરોએ ગયા મહિને માંગમાં સુધારો જોયો હતો. આનું એક મુખ્ય કારણ ગયા વર્ષે ડીલરો દ્વારા વાહનો પર આપવામાં આવેલ ભારે ડિસ્કાઉન્ટ હતું, જેના કારણે જૂના મોડેલો વેચવામાં અને નોંધણી વધારવામાં મદદ મળી હતી.

ગયા મહિને ટુ-વ્હીલરનું છૂટક વેચાણ 15,25,826 યુનિટ થયું હતું, જે ગયા વર્ષના સમાન મહિનામાં 14,65,039 યુનિટની સરખામણીમાં 4 ટકાનો વધારો દર્શાવે છે. FADA એ તેના અહેવાલમાં ડીલર ઇન્વેન્ટરી સ્તરમાં સુધારો પણ દર્શાવ્યો છે, જે લગભગ પાંચ દિવસ ઘટીને 50-55 દિવસ થઈ ગયો છે. આ પુરવઠા-માંગ સંતુલનમાં સુધારો દર્શાવે છે.

જાન્યુઆરીમાં વાણિજ્યિક વાહનોનું વેચાણ વાર્ષિક ધોરણે 8 ટકા વધીને 99,425 યુનિટ થયું. FADA મુજબ, ઊંચા નૂર દર અને પેસેન્જર વાહનોની માંગને કારણે વૃદ્ધિમાં વધારો થયો હતો, પરંતુ ઘણા ડીલરોએ માંગમાં ઘટાડો કરવાના મુખ્ય પરિબળો તરીકે ઓછી રોકડ પ્રવાહ, ચુસ્ત નાણાકીય નીતિઓ અને ધીમી ઔદ્યોગિક માંગ (જેમ કે સિમેન્ટ અને કોલસો) નો ઉલ્લેખ કર્યો હતો. જાન્યુઆરીમાં ટ્રેક્ટરનું વેચાણ વાર્ષિક ધોરણે 5 ટકા વધીને 93,381 યુનિટ થયું છે, જ્યારે ત્રણ પૈડાવાળા વાહનોનું છૂટક વેચાણ ગયા મહિને 7 ટકા વધીને 1,07,033 યુનિટ થયું છે.

શહેરી વિસ્તારોમાં વેચાણ વાર્ષિક ધોરણે ગ્રામીણ વિસ્તારો કરતાં વધુ થયું છે, જે ગયા વર્ષે 4 ટકાની સરખામણીમાં આ વર્ષે 5 ટકા વધ્યું છે. FADA એ જણાવ્યું હતું કે ડીલરોએ નવા મોડેલ લોન્ચ, લગ્નની મોસમની માંગ અને વધુ સારા ધિરાણને વૃદ્ધિના મુખ્ય ચાલક તરીકે ગણાવ્યા હતા. જોકે, તેમણે કહ્યું કે વધતા વ્યાજ દર, ગ્રામીણ વિસ્તારોમાં રોકડ પ્રવાહનો અભાવ અને બજારની અનિશ્ચિતતા અંગે ચિંતા હજુ પણ યથાવત છે.