દિલ્હી મેટ્રોના ભાડામાં વધારો, પ્રવાસીઓના ખિસ્સાને થશે અસર

દિલ્હી મેટ્રો રેલ કોર્પોરેશન (DMRC)એ સોમવાર, 25 ઓગસ્ટથી શરૂ થતા ટિકિટ ભાડામાં સત્તાવાર રીતે સુધારો કર્યો હોવાથી રાષ્ટ્રીય રાજધાનીના મુસાફરોએ હવે તેમની મેટ્રો મુસાફરી માટે વધુ પૈસા ચૂકવવા પડશે. આઠ વર્ષમાં આ પહેલો ભાડા વધારો છે, જેમાં છેલ્લો સુધારો 2017માં ચોથી ભાડા નિર્ધારણ સમિતિની ભલામણોના આધારે કરવામાં આવ્યો હતો.

DMRCએ કહ્યું હતું કે, ભાડામાં ફેરફાર નજીવો છે, મોટાભાગની લાઇનોમાં 1થી 4 રૂપિયાનો વધારો થશે. જોકે, એરપોર્ટ એક્સપ્રેસ લાઇન પર ભાડામાં 5 રૂપિયા સુધીનો વધારો જોવા મળશે. સોશિયલ મીડિયા પ્લેટફોર્મ X પર એક સત્તાવાર પોસ્ટમાં, DMRCએ પુષ્ટિ કરી કે, "દિલ્હી મેટ્રો સેવાઓના મુસાફરોના ભાડામાં આજથી એટલે કે 25 ઓગસ્ટથી સુધારો કરવામાં આવ્યો છે. આ વધારો ન્યૂનતમ છે, ₹ 1થી ₹ 4 સુધીનો છે જે ફક્ત મુસાફરીના અંતર પર આધાર રાખે છે (એરપોર્ટ એક્સપ્રેસ લાઇન માટે ₹ 5 સુધી)."

નવા ભાડા માળખામાં તમામ અંતર સ્લેબમાં ફેરફાર જોવા મળે છે. 0થી 2 કિલોમીટર વચ્ચે ટૂંકા અંતરની મુસાફરી કરનારા મુસાફરોએ હવે 11 રૂપિયા ચૂકવવા પડશે, જ્યારે 32 કિલોમીટરથી વધુ અંતર કાપનારા મુસાફરોએ 64 રૂપિયા ચૂકવવા પડશે, જે અગાઉના મહત્તમ ભાડા 60 રૂપિયાથી વધુ છે. આ વધારા પહેલાં, લઘુત્તમ ભાડું 10 રૂપિયા હતું. સુધારેલા ભાડા સ્લેબ હવે સમગ્ર મેટ્રો નેટવર્કમાં અમલમાં છે, જે 390 કિલોમીટરથી વધુ વિસ્તાર ધરાવે છે અને દિલ્હી અને રાષ્ટ્રીય રાજધાની ક્ષેત્રમાં 285 થી વધુ સ્ટેશનોને સેવા આપે છે. મુસાફરો, ખાસ કરીને કેઝ્યુઅલ પ્રવાસીઓ અને પરિવારોને થોડી રાહત આપવાના પ્રયાસરૂપે, DMRCએ રવિવાર અને રાષ્ટ્રીય રજાઓ માટે ડિસ્કાઉન્ટેડ ભાડા સ્લેબ રજૂ કર્યા છે. આ દિવસોમાં, ટૂંકા અને મધ્યમ અંતરની મુસાફરી માટે ભાડું નોંધપાત્ર રીતે ઓછું હશે, જેમાં 5 કિલોમીટર સુધીના અંતરની મુસાફરીનો ખર્ચ 11 રૂપિયા અને 32 કિલોમીટરથી વધુની મુસાફરી માટે મહત્તમ ભાડું 54 રૂપિયા નક્કી કરવામાં આવ્યું છે.

ભાડા વધારાની જાહેરાતની ઘણા મુસાફરો અને સોશિયલ મીડિયા યુઝર્સે તરફથી ટીકા થઈ છે, જેમાંથી ઘણાએ આ પગલાના સમય અને આવશ્યકતા પર પ્રશ્ન ઉઠાવ્યા છે. ઘણા યુઝર્સે જીવનનિર્વાહના વધતા ખર્ચ અંગે ચિંતા વ્યક્ત કરી અને વધેલી આવકનો ઉપયોગ કેવી રીતે કરવામાં આવશે તે અંગે પારદર્શિતાની માંગ કરી. વિરોધ છતાં, DMRC અધિકારીઓનું માનવું છે કે કામગીરી ટકાઉપણું સુનિશ્ચિત કરવા, ઉચ્ચ સેવા ધોરણો જાળવવા અને ભવિષ્યના માળખાગત સુધારાઓને ટેકો આપવા માટે ભાડામાં સુધારો જરૂરી છે.

Delhi Metro fare hike, will affect commuters' pockets